تالدىقورعاندا قالا كۇنىنە الىپ تورت پەن پيتسا ازىرلەندى
مەرەكەگە وراي ارنايى كورمە ۇيىمداستىرىلىپ، اسپازدار بار ونەرىن سالىپ، ءتاتتى تورت جانە الىپ پيتسا ءپىسىرىپ بەردى. تورتقا 980 جۇمىرتقا، 75 كەلى ۇن، 50 ك گ قانت كەتتى. ءتاتتى تاعامدى 6 اسپاز 7 كۇن بويى ازىرلەگەن. تالدىقورعاندىقتارعا حالىق ءارتىسى روزا رىمبايەۆا، دوسمۇقاسان توبى جانە باسقا دا ونەر جۇلدىزدارى اننەن شاشۋ شاشىپ، ىستىق لەبىزدەرىن ءبىلدىردى.
الماتى وبلىسىنىڭ ورتالىعى تالدىقورعان قالاسى تۇرعىندارىنىڭ سانى 173 مىڭنان اسىپ، سوڭعى 10 جىلدا ەكى ەسەگە كوبەيدى. كۇننەن- كۇنگە گۇلدەنىپ، كوركەيىپ، دامىپ كەلە جاتقان شاھار جۇرتشىلىعىن ءوڭىر باسشىسى اماندىق باتالوۆ قۇتتىقتادى.
وبلىس اكىمىنىڭ ايتۋىنشا قالانىڭ الەۋمەتتىك ەكونوميكالىق كورسەتكىشتەرى جىلدان- جىلعا ەسەلەنىپ كەلەدى. بيىلعى جىلدىڭ 8-ايىندا ونەركاسىپ ءونىمىنىڭ كولەمى 44,6 ميلليارد تەڭگەگە جەتتى. تۇرعىن ءۇي قۇرىلىس جۇمىستارى قارقىندى جۇرگىزىلۋدە. قالادا 47,3 مىڭ شارشى مەتر تۇرعىن ءۇي قولدانىسقا بەرىلدى. بۇل 2017 -جىلدىڭ دەڭگەيىنەن 2,7 ەسەگە كوپ.
«قالا ەكونوميكاسىنا 33,2 ميلليارد تەڭگەدەن استام ينۆەستيتسيا تارتىلدى. قالامىزدا بۇگىنگى زامانعا ساي، ساۋلەتتى، بىرەگەي عيماراتتار - كورمە ورتالىعى، سالتانات سارايى ەل يگىلىگى ءۇشىن قىزمەت ەتۋدە. «جاستار» ساياباعى، قاراتال وزەنىنىڭ جاعالاۋى - وبلىس ورتالىعىنىڭ اجارىن ايشىقتاپ، تۇرعىنداردىڭ سۇيىكتى دەمالىس ورنىنا اينالدى. الداعى ۋاقىتتا دا تۋعان قالامىزدىڭ قۇلپىرىپ، كوركەيە بەرەتىنىنە سەنىمىم زور"، دەپ اتاپ ءوتتى ا. باتالوۆ.
