قىزىلوردادا قازاق اتاۋىن قايتارعان تاريحي نىسان كوشىرمەسى پايدالانۋعا بەرىلدى
بۇل نىسان 1925 -جىلى قىزىلوردا استانا مارتەبەسىن العان تۇستا ۇلتقا قازاق اتاۋىن قايتارىپ بەرۋ تۋرالى تاريحي شەشىم قابىلدانعان قازاق ورتالىق اتقارۋ كوميتەتى عيماراتىنىڭ سىزبا- نۇسقاسى نەگىزىندە سالىنعان، دەپ حابارلايدى قازاقپارات ءتىلشىسى.
اتالمىش شاراعا ق ر مەملەكەتتىك حاتشىسى گۇلشارا ءابدىحالىقوۆا، وبلىس اكىمى قىرىمبەك كوشەربايەۆ جانە ءبىرقاتار قوعام قايراتكەرلەرىنىڭ قاتىستى.
گۇلشارا ءابدىحالىقوۆا قىزىلوردالىقتاردى قالا كۇنى مەرەكەسىمەن قۇتتىقتاپ، ايماقتىڭ الەۋمەتىك- مادەني دامۋىنداعى جەتىستىكتەرىن اتاپ ءوتتى.
«وزدەرىڭىز بىلەتىندەي، قازاقستان بويىنشا اۋقىمدى «رۋحاني جاڭعىرۋ» باعدارلاماسى جۇزەگە اسۋدا. سونىڭ ىشىندە قىزىلوردا وبلىسىندا ەسكەرتكىشتەر سالىنىپ، تاريحي جەرلەردى قايتا قالپىنا كەلتىرۋ جۇمىستارى جۇرگىزىلۋدە. بۇگىن ءبىز تەك ارحيتەكتۋرالىق ەسكەرتكىشتىڭ جاي كوشىرمەسى عانا ەمەس، «رۋحاني جاڭعىرۋ» باعدارلاماسى اياسىندا شارالار وتكىزىلەتىن ماڭىزدى مادەني نىساننىڭ اشىلۋىنا قاتىسىپ وتىرمىز» ، - دەدى گۇلشارا ءابدىقالىقوۆا.
ايماق باسشىسى قىرىمبەك كوشەربايەۆ جينالعان كوپشىلىكتى قىزىلوردا قالاسىنىڭ مەرەيتويى جانە ورتالىقتىڭ اشىلۋ سالتاناتىمەن قۇتتىقتادى
«بيىل ءبىز استانا مەن قىزىلوردا قالاسىنىڭ مەرەيتويىن اتاپ وتۋدەمىز. 20 جىل بۇرىن مەملەكەت باسشىسى نۇرسۇلتان نازاربايەۆ تاۋەلسىز قازاقستاننىڭ ەلورداسىن استانا قالاسىنا كوشىرۋ تۋرالى ستراتەگيالىق شەشىم قابىلداپ، سول ارقىلى جاسامپاز مەملەكەتىمىزدىڭ تۇتاستىعىن قامتاماسىز ەتتى. قىزىلوردا جانكەنت، شىرىك- رابات، سىعاناق سىندى ەجەلگى استانالاردىڭ جانە اق وردا مەن التىن وردا سياقتى حان وردالارىنىڭ اۋماعى، كەڭەس وداعى كەزىندە قازاق رەسپۋبليكاسىنىڭ استاناسى، سونداي- اق، اعارتۋ، ساياسي جانە ونەركاسىپتىك دامۋ ورتالىعى بولدى. ۇلتىمىزدىڭ رەسمي «قازاق» اتالۋى تۋرالى شەشىم دە وسى كيەلى مەكەندە قابىلداندى. بيىل ەلوردامىز استانانىڭ 20 جىلدىق جانە قىزىلوردا قالاسىنىڭ 200 جىلدىق مەرەيتويلارىن قاتار اتاپ وتۋدەمىز. بۇل قازاقستاننىڭ العاشقى جانە قازىرگى استانالارى اراسىنداعى ەرەكشە رۋحاني بايلانىستى اڭعارتادى دەپ ويلايمىن. ءبىز ۇلتتىق قۇندىلىقتارىمىزدى ساقتاپ ءارى جاڭعىرتۋىمىز كەرەك» ، - دەدى ايماق باسشىسى.
ەستەرىڭىزگە سالا كەتەيىك، 2017 -جىلى سىرداريانىڭ سول جاعالاۋىندا جاڭا قالانىڭ قۇرىلىسى باستالدى. قازىرگى تاڭدا جەكە ينۆەستيتسيا قارجىسى ەسەبىنەن كوپقاباتتى 18 تۇرعىن ءۇيدىڭ، «بولاشاق» ۋنيۆەرسيتەتى كامپۋسىنىڭ جانە مەملەكەتتىك- جەكەمەنشىك ارىپتەستىك شەڭبەرىندە 320 ورىندىق بالاباقشانىڭ، مەملەكەت قارجىسى ەسەبىنەن جاستارعا قىزمەت كورسەتۋ ورتالىعى مەن قاجەتتى ينفراقۇرىلىمداردىڭ قۇرىلىسى جۇرگىزىلۋدە. 2019-2020 -جىلدارى سول جاعالاۋدا ءبىرقاتار كوپقاباتتى ۇيلەر، مەكتەپتەر، وبلىستىق كوپسالالى اۋرۋحانا، نەكە سارايى، بالاباقشا، فيزيكا- ماتەماتيكالىق مەكتەپ جاتاقحاناسىمەن بىرگە، ساۋدا- ويىن ساۋىق كەشەنىن سالۋ جوسپارلانىپ وتىر.
قىزىلوردانىڭ 200 جىلدىعىنا وراي بۇگىن «قاۋىن- قاربىز» ، «قىمىز- شۇبات» جانە «باۋىرساق» فەستيۆالدەرى ۇيىمداستىرىلدى. سونداي- اق، ن. بەكەجانوۆ اتىنداعى دراما تەاترىنداعى سالتاناتتى شارا وتكىزىلدى. ورتالىق الاڭدا وتاندىق ونەر جۇلدىزدارىنىڭ قاتىسۋىمەن گالا- كونسەرت بولدى.
