رەيسكە ۇلگەرمەگەن جولاۋشى ۇشاقتىڭ ارتىنان قۋىپ جەتىپ، قاماۋعا الىندى

  استانا. قازاقپارات - دۋبليننەن Ryanair رەيسىنە كەشىككەن جولاۋشى تەرمينالدان شىعىپ، ۇشاقتىڭ ارتىنان قۋىپ كەتتى. الايدا، ۇشۋ جولاعىندا تۇرعان ۇشاقتى قۋىپ جەتپەكشى بولعان جولاۋشى ەرەجە بۇزعانى ءۇشىن قاماۋعا الىندى.

يرلانديالىق پاتريك كەحو دۋبليننەن تاڭعى ساعات جەتىدە امستەردامعا ۇشىپ كەتۋى ءتيىس ۇشاققا كەشىگىپ قالدى.

كۋاگەرلەردىڭ ايتۋىنشا، اۋەجاي تەرەزەسىنەن ۇشاعىنىڭ تەرمينالدان كەتىپ بارا جاتقانىن كورگەن جاس جىگىت اينەكتى سوققىلاپ، ۇشۋدى توقتاتا تۇرۋدى تالاپ ەتكەن.

بۇل ارەكەتىنەن ەشقانداي ناتيجە شىقپاعان سوڭ، ول قانداي دا ءبىر جولمەن كەدەرگىدەن ءوتىپ كەتىپ، ۇشۋ جولاعىنا شىعىپ، اۋە كەمەسىن قۋىپ جەتۋگە تىرىستى.

رەيسكە كەشىككەن جولاۋشى وسىلايشا ۇشاقتى توقتاتا تۇرماقشى بولعان. ەر ادام ۇشۋ جولاعىنداعى ۇشاقتى قۋىپ جەتكەنىمەن، ءبىراق ونى اۋەجايدىڭ قاۋىپسىزدىك قىزمەتى جانە پوليتسيا قىزمەتكەرلەرى ۇستاپ الدى. سول كەزدە كۇزەتشىلەر مەن قىزبا جولاۋشىنىڭ اراسىنا قاقتىعىس تۋىپ، ءتارتىپ بۇزعان جولاۋشى قاماۋعا الىندى.