تۇركىستانداعى حالىقارالىق اۋەجايدى تۇركيالىق كومپانيا سالادى
ءوڭىر باسشىسى سونداي- اق، جاڭا وبلىس ورتالىعىندا ەكى بىردەي بەس جۇلدىزدى قوناقۇي تۇرعىزىلاتىنىن اتاپ ءوتتى. بۇدان بولەك، تۇركىستاندا ەلىمىزدە تەڭدەسى جوق 200 گەكتارلىق جىلىجاي سالىناتىنىن جەتكىزدى. ال، ەرتەڭ تۇيە ءسۇتىن وڭدەيتىن الىپ زاۋىت اشىلادى دەپ كۇتىلۋدە. جانسەيىت تۇيمەبايەۆ فورۋمدا، سونىمەن قاتار، تۇركىستان وبلىسى ينۆەستيتسيا تارتۋ بويىنشا رەسپۋبليكادا كوش باسىندا كەلەتىنىن ايتتى. ماسەلەن، وتكەن جىلى بۇل ماقساتتا 482 ميلليارد تەڭگە قارجى قۇيىلعان. ەندى تاعى 4,8 ميلليارد ا ق ش دوللارىن قۇرايتىن 26 جوبانى جۇزەگە اسىرۋ جوسپاردا بار. قازىردىڭ وزىندە ونىڭ 12 سى ىسكە اسىرىلىپ جاتىر.
«تۇركىستان - تالاي جىلدار بويى قازاق حاندىعىنىڭ جانە تۇركى الەمىنىڭ ساياسي ورداسى، رۋحاني استاناسى بولعان شاھار. ەلباسىمىز وسىناۋ كونە قالانى وبلىس ورتالىعى ەتىپ، ونى دامىتۋعا ەرەكشە ىقىلاس تانىتىپ وتىرعانى بەلگىلى. بۇگىندە مەملەكەت تاراپىنان جالپى قۇنى 2 ميلليارد ا ق ش دوللارىن قۇرايتىن ينۆەستيتسيا قۇيۋ جوسپارلانىپ وتىر. ياعني، مۇندا اۋەجاي، اكىمشىلىك- ىسكەرلىك ورتالىق جانە تۇرعىن ۇيلەر بوي كوتەرىپ، تۇركىستان زاماناۋي ۇلگىدەگى تەحنولوگيا ەنگىزىلگەن اقىلدى قالاعا اينالاتىنى ءسوزسىز. قازىردىڭ وزىندە ءوڭىردىڭ ەكونوميكالىق دامۋ مۇمكىندىگىنە قانىققان وتاندىق جانە تۇرىك كومپانيالارى 100 ميلليون ا ق ش دوللارىنان اساتىن قارجى سالىپ، 5 جۇلدىزدى قوناق ۇيلەر، ويىن- ساۋىق، ساۋدا ورىندارى مەن فيتنەس ورتالىقتار اشۋدى كوزدەپ وتىر. بۇگىنگى جيىن وزدەرىڭىزبەن وسىنداي ىسكەرلىك قارىم- قاتىناس ورناتىپ، نىعايتۋعا سەپ بولادى دەگەن سەنىمدەمىن» ، - دەدى جانسەيىت قانسەيىت ۇلى.
سونىمەن قاتار، ءوڭىردى دامىتۋعا باعىتتالعان كەز كەلگەن جوبانى بارلىق تاراپتان قولداۋعا دايىن ەكەنىن ايتقان وبلىس اكىمى، ايماقتى ءۇش باعىتتا دامىتۋعا باسىمدىق بەرىلگەنىن جەتكىزدى. ەرەكشە تاريحي- ارحيتەكتۋرالىق جانە ارحەولوگيالىق ەسكەرتكىشتەرى، ايرىقشا تابيعاتى بار ءوڭىردىڭ ءبىرىنشى دامۋ باعىتى - تۋريزم. قازىردىڭ وزىندە مۇندا كەلەتىن تۋريتەر سانى جىل ساناپ ارتىپ كەلەدى. ماسەلەن، وتكەن جىلى وبلىسقا 270 مىڭنان استام شەتەلدىك كەلگەن. بۇل 2016 -جىلمەن سالىستىرعاندا 40 پايىزعا ارتىق. ينۆەستيتسيا تارتۋعا قولايلى ەكىنشى باعىت - اۋىل شارۋاشىلىعىن. اۋا رايى جايلى وبلىستىڭ اۋىل شارۋاشىلىق سالاسى دامۋى جاعىنان رەسپۋبليكادا ءبىرىنشى ورىنعا شىققان. سونداي- اق، لوگيستيكالىق جانە ترانزيتتىك الەۋەتتى كوتەرۋ - كەستەدە تۇرعان ءۇشىنشى ماسەلە.
وبلىستىڭ ەكونوميكالىق جانە ينۆەستيتسيالىق الەۋەتىنە قانىققان شەتەلدىك قوناقتار تۇركىستان وڭىرىندە تۋريزم، اۋىل شارۋاشىلىعى، كاسىپكەرلىك سالالارىن دامىتۋعا اتسالىسۋعا نيەتتى ەكەندىكتەرىن ءبىلدىردى. سونداي- اق، يران، مالايزيا، قىتاي ەلدەرىنەن كەلگەن ينۆەستورلار ايماقتا زاماناۋي ۇلگىدەگى الەۋمەتتىك نىساندار سالىپ، ينراقۇرىلىم مەن سيفرلىق تەحنولوگيانى دامىتۋعا كۇش سالاتىنىن دا اتاپ ءوتتى.
اۆتور: اينۇر اقبايەۆا
