تەڭگە باعامى قازان ايىندا قانداي بولادى

استانا. قازاقپارات - الپاري ساراپتامالىق دەپارتامەنتىنىڭ ديرەكتورى الەكساندر رازۋۆايەۆ قازاقپارات تىلشىسىنە سۇحبات بەرىپ، قازاقستانداعى ۆاليۋتالىق- ەكونوميكالىق جاعدايعا بولجام جاسادى.

«قازاقستان ەكونوميكاسى تۇراقتى دامىپ كەلەدى. ءوسىم قارقىنى جىلىنا شامامەن 4 پايىزدى قۇرايدى. قازاقستان ەكونوميكاسىنىڭ نەگىزگى ءوسىمى مۇناي ءوندىرۋدىڭ مول كولەمى مەن شيكىزاتتىڭ الەمدىك باعاسىنىڭ جوعارى بولۋى ەسەبىنەن قامتاماسىز ەتىلىپ وتىر. مۇناي باعاسىنىڭ وسە ءتۇسۋى مۇنايدى ەكسپورتتاۋشى ەلدەر جانە ولاردىڭ ۆاليۋتاسى ءۇشىن تۇراقتى دامۋداعى باستى فاكتور سانالادى. قازىرگى ۋاقىتتا كونيۋنكتۋرا وتە قولايلى، ال قازاقستان رەسپۋبليكاسىنىڭ ەكونوميكاسى كىناراتسىز كورىنەدى، پەرسپەكتيۆاسى دا بارىنشا وڭ. دەگەنمەن، تاۋەكەلدەردى تومەندەتۋ جانە ءوسىم قارقىنىندا ساتسىزدىكتەر بولماۋى ءۇشىن ەكونوميكانىڭ شيكىزات ەمەس سەكتورىن دامىتۋ قاجەت»، - دەدى ساراپشى.

 الەكساندر رازۋۆايەۆتىڭ بولجاۋىنشا، قازان ايىندا Brent ماركالى مۇنايدىڭ باررەلى 80 دوللار بولعان جاعدايدا قازاقستاننىڭ ۇلتتىق ۆاليۋتاسى ودان ارى نىعايا تۇسەدى دەپ كۇتىلەدى. دوللار باعامى 350-370 تەڭگە توڭىرەگىندە، ال ەۋروپالىق ۆاليۋتا كۇزدىڭ ورتاسىندا 410-425 تەڭگە شەگىندە ساۋدالاناتىن بولادى. قارقىندى دامىپ كەلە جاتقان ەلدەردىڭ ۆاليۋتاسىنا ا ق ش فەدەرالدى رەزەرۆتىك جۇيەسىنىڭ پايىزدىق ستاۆكاسىنىڭ ءوسۋ فاكتىسى قىسىم كورسەتە بەرەدى. 26 - قىركۇيەكتە ستاۆكا 25 بازيستىك تارماققا ارتقان ەدى جانە قازىرگى ۋاقىتتا 2,00-3,25 پايىزدى قۇرايدى.

«2018 -جىلدىڭ قورىتىندىسىندا قازاقستانداعى ءوندىرىس دەڭگەيىنىڭ ءوسىمى 4,5 پايىزدى قۇرايدى دەپ ەسەپتەيمىز. ەل ەكونوميكاسى ءۇشىن بۇل بارىنشا لايىقتى كورسەتكىش. كوپتەگەن دامىعان ەلدەر مۇنان دا تومەن مالىمەتتەر كورسەتەدى. ساۋدا، قىزمەت كورسەتۋ جانە وزگە دە شيكىزاتتىڭ ەمەس سەكتور سالالارىنىڭ ءوسىم كورسەتكىشى بار. قازىرگى ۋاقىتتا ولار تولىقتاي ينۆەستيتسيالانىپ وتىرعان جوق جانە لايىقتى قايتارىم بەرمەۋدە»، - دەدى ساراپشى.

سونىمەن قاتار، ول ا ق ش پەن قىتاي اراسىندا تۋىنداعان ساۋدا تەكەتىرەسى قازاقستان ەكونوميكاسىنىڭ ءوسىمى ءۇشىن جاڭا مۇمكىندىكتەر اشاتىندىعىن باسا ايتتى.

اۆتور: مارلان جيەمباي