جۇمىسپەن قامتۋدا وزگەرىستەر بولادى - ۆيتسە-پرەمەر
«قازاقستاننىڭ ءۇشىنشى جاڭعىرۋى اياسىندا ەكونوميكالىق ءوسىمنىڭ جاڭا مودەلى ايقىندالدى. ول ەكونوميكانىڭ ءارتاراپتاندىرىلۋىنا، جەكە سەكتوردىڭ كوش باستاۋشى ءرولى مەن ەڭبەك ونىمدىلىگىن ارتتىرۋعا نەگىزدەلگەن. ەكونوميكا سالالارىنداعى ەڭبەك ونىمدىلىگىن كەم دەگەندە 50 پايىزعا ارتتىرۋ كۇتىلۋدە. سونىمەن قاتار، ءبىز جاڭا تەحنولوگيالاردىڭ دامۋىمەن جانە سيفرالاندىرۋمەن ۇشتاساتىن قازىرگى زامانعى جاھاندىق وزگەرىستەردى ەسكەرۋىمىز قاجەت. جاڭا جاعدايلاردا جۇمىس كۇشىنىڭ ساپاسىنا، بىلىكتىلىگىنە جاڭا تالاپتار قويىلاتىن بولادى. ەسكى كاسىپتەردىڭ وزگەرۋى نەمەسە ءتىپتى جوعالىپ كەتۋى دە جانە بولاشاقتا جاڭا كاسىپتەر پايدا بولادى دەپ بولجانادى. سالالار دا وزگەرىستەرگە ۇشىرايدى، ءوندىرۋشى سالالارعا جۇمىس كۇشىنىڭ اعىنى كوبەيەدى»، - دەدى ە. دوسايەۆ.
سونىمەن قاتار ول جاھاندىق وزگەرىستەرمەن قاتار، ىشكى وزگەرىستەر دە بولاتىنىن اتاپ ءوتتى.
«ماسەلەن، ءومىر ءسۇرۋ ۇزاقتىعىنىڭ ۇلعايۋىمەن قاتار، 2000-جىلداردىڭ ورتاسىنان ورىن العان بەبي-بۋم ەڭبەك نارىعىنا قوسىمشا جۇكتەمە اكەلەدى. وسىلايشا، ءبىر جاعىنان نارىق تالاپتارىنا سايكەس كەلەتىن ءوندىرۋشى جۇمىس ورىندارىن قۇرۋدى قامتاماسىز ەتۋ، ەكىنشى جاعىنان سۇرانىسقا يە بىلىكتى كادرلاردى دايارلاۋ قاجەت. بۇل ۇكىمەت پەن وبلىس جانە رەسپۋبليكالىق ماڭىزى بار قالالار اكىمدەرىنىڭ الدىنا قويىلعان ورتاق مىندەت. وسى مىندەتتى شەشۋدىڭ نەگىزگى قۇرالى - جاڭا «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ» باعدارلاماسى بولىپ وتىر»، - دەدى ۆيتسە-پرەمەر.
ونىڭ اتاپ وتۋىنشە، داعدارىس كەزەڭدەرىندە ماڭىزدى ماسەلەلەر ءبىرى رەتىندە جۇمىسپەن قامتۋعا جاردەمدەسۋدىڭ ۋاقىتشا شارالارى ەسكەرىلگەن. ونىڭ ىشىندە ينفراقۇرىلىمدىق جوبالار ارقىلى جۇمىسپەن قامتۋدى قولداۋ بولسا، وندا قازىرگى كەزدە ءوندىرۋشى جانە تۇراقتى جۇمىس ورىندارىن قۇرۋعا، سونداي-اق ەكونوميكانىڭ جاڭا تالاپتارىنا جاۋاپ بەرەتىن مامانداردى دايارلاۋعا باستى نازار اۋدارىلعان.
«باعدارلاما ىسكە اسىرىلا باستاعاننان بەرى 556 مىڭ قاتىسۋشى تۇراقتى جۇمىسقا ورنالاستىرىلدى»، - دەدى ە. دوسايەۆ.
