قازاقستان جاستارى نەلىكتەن جۇمىسسىز: ءماجىلىس ءتوراعاسى سەبەبىن ايتتى

None
None
استانا. قازاقپارات - ءماجىلىس ءتوراعاسى نۇرلان نىعماتۋلين ستۋدەنت جاستارعا ماماندىعى بويىنشا جۇمىسقا ورنالاسۋ نەلىكتەن قيىن ەكەنىن ءتۇسىندىردى، دەپ حابارلايدى قازاقپارات ءتىلشىسى.

«ارينە، ەڭبەكپەن قامتۋ سالاسىندا جەتكەن جەتىستىكتەرىمىز كوپ. ءبىراق شەشىلمەگەن سۇراقتار دا از ەمەس. ول بىرىنشىدەن، ءوزىن-ءوزى جۇمىسپەن قامتىعان ازاماتتارعا قاتىستى. مەملەكەت باسشىسى ولاردى ەسەپكە الۋ، كولەڭكەلى ايماقتان شىعارۋ تۋرالى تاپسىرما بەردى. بۇل ءوز كەزەگىندە ۇكىمەت، ورتالىق جانە جەرگىلىكتى مەملەكەتتىك ورگاندار جانە دەپۋتاتتىق كورپۋستىڭ بىرلەسە جۇمىس ىستەۋىن قاجەت ەتەدى. بۇگىندە ءبىزدىڭ دەپۋتاتتارىمىز «حالىقتىڭ جۇمىسپەن قامتىلۋىن فورماليزاتسيالاۋ تۋرالى» زاڭ جوباسىمەن جۇمىسقا كىرىستى»، - دەپ توقتالدى ن. نىعماتۋلين جۇمىسپەن قامتۋ ماسەلەلەرىنە ارنالعان پارلامەنتتىك تىڭداۋ بارىسىندا.

بۇدان بولەك، ءماجىلىس ءتوراعاسى بۇگىندە ءبىلىم بەرۋ مەكەمەلەرىندە مامانداردى دايارلاۋ نارىق تالاپتارىنا ساي بولماي تۇرعانىن ەسكەردى.

«سەبەبى كادرلارعا دەگەن سۇرانىسقا بايلانىستى تەرەڭ تالداۋ جاسالمايدى. ءبىلىم بەرۋ باعدارلامالارى دا قازىرگى تالاپتى تولىقتاي ورىنداماي وتىر. سول سەبەپتەن، ستۋدەنت جاستارعا وقۋىن بىتىرگەننەن كەيىن ماماندىعى بويىنشا جۇمىس تابۋ قيىن. وسى ماسەلەنى شەشۋ ءۇشىن كادرلارعا دەگەن قاجەتتىلىك مونيتورينگىنىڭ ءتيىمدى جۇيەسىن قۇرۋ قاجەت دەپ ەسەپتەيمىز. ول - مەملەكەتتىك تاپسىرىستى دۇرىس قالىپتاستىرۋعا ۇلكەن مۇمكىندىك بەرەدى»، - دەدى ن. نىعماتۋلين.

ونىڭ اتاپ وتۋىنشە، بۇگىنگى كۇنى ەلىمىزدە 7 ميلليونعا جۋىق جۇمىسكەردىڭ جوعارى جانە ورتا كاسىپتىك ءبىلىمى بار. ول جۇمىسپەن قامتىلعان بارلىق ازاماتتاردىڭ 79 پايىزىن قۇرايدى. بۇل قازاقستانداعى ەڭبەك رەسۋرستارىنىڭ ساپاسى جوعارى ەكەنىنىڭ دالەلى.

اۆتور: رۋسلان عابباسوۆ

 

سوڭعى جاڭالىقتار