تاجىكستان تاۋەلسىز مەملەكەتتەر دوستاستىعى سامميتىنە قالاي دايىندالدى

دۋشانبە. قازاقپارات - دۋشانبەدەگى «كوحي سومون» رەزيدەنسياسىندا ت م د مەملەكەت باسشىلارى كەڭەسىنىڭ كەزەكتى سامميتىنە دايىندىق جۇمىستارى قىزۋ ءجۇرىپ جاتىر. ءبىر ساعاتتان كەيىن بۇل جەرگە بىرنەشە ەلدىڭ پرەزيدەنتى كەلىپ، ۇيىم اياسىنداعى ماڭىزدى ماسەلەلەردى تالقىلايدى.

ولاردىڭ ىشىندە ق ر پرەزيدەنتى نۇرسۇلتان نازاربايەۆ تا بار. قازاقپارات ءتىلشىسى تاجىكستان پرەزيدەنتىنىڭ رەزيدەنسياسىن ارالاپ، سامميتكە دايىندىق شارالارىمەن تانىستى.

«كوحي سومون» كەشەنى - تاجىكستان پرەزيدەنتى اپپاراتىنا كىرەتىن ءىرى نىسانداردىڭ ءبىرى. ونىڭ جالپى اۋدانى - 22 مىڭ شارشى مەتر. بەس قاباتتى عيماراتتىڭ ىشىندە بىرنەشە زال بار. سونىڭ بارلىعى حالىقارالىق شارالاردى وتكىزۋگە ارنالعان. ماسەلەن، ت م د مەملەكەت باسشىلارىنىڭ شاعىن قۇرامداعى كەزدەسۋى، عيماراتتىڭ ەكىنشى قاباتىندا ورنالاسقان زالدا وتەدى. كۇزەت قىزمەتى ول زالدى فوتوعا ىشىنەن تۇسىرۋگە رۇقسات بەرمەدى. دەگەنمەن، ءبىز ونى ەسىكتىڭ بەرگى جاعىنان ءتۇسىرىپ الدىق.

 

جوعارى قاباتتا رەسمي دەلەگاتسيالارعا ارنالعان كوفە- برەيكتى جاساپ قويدى. ازىرشە، ەشكىم كورىنبەيدى. كۇزەت قىزمەتكەرلەرى وسى مۇمكىندىكتى پايدالانىپ، جۇرەك جالعاپ ءجۇر. سەبەبى سامميت باستالعاننان كەيىن مۇمكىندىك بولمايدى.

 

بەسىنشى قاباتتا ت م د باسشىلارى كەڭەسىنىڭ كەڭەيتىلگەن وتىرىسى وتەدى. ول جەرگە پرەزيدەنتتەر شاعىن قۇرامداعى كەزدەسۋدەن كەيىن كەلەدى.

 

ال ءبىرىنشى قاباتتا جۋرناليستەرگە ارنالعان باسپا ءسوز ورتالىعى جۇمىس ىستەۋدە. وندا 30-عا جۋىق كومپيۋتەر قويىلعان. سول جەرگە سامميتتەن تىكەلەي ەفير بەرىلەدى.

 

باسپاءسوز قىزمەتى ارقىلى تاعى ءبىر ۇلكەن زالعا وتۋگە بولادى. ونىڭ ءىشى ق ر پارلامەنت ءماجىلىسىنىڭ بۇرىنعى عيماراتىنداعى دومالاق زالعا ۇقسايدى. زالدىڭ قاق ورتاسىنداعى ەكران ارقىلى جۋرناليستەر تىكەلەي ەفيردى كورە الادى.

 

 جوسپار بويىنشا تاجىكستان پرەزيدەنتى ەمومالي راحمون بارلىق قوناقتارىن دالادا كۇتىپ الادى. ال فوتوعا تۇسكەننەن كەيىن ت م د باسشىلارى «كوحي سومون» رەزيدەنسياسىنا كىرىپ، ءوز جۇمىستارىنا كىرىسەدى.

 

سونداي- اق، ءدال وسى جەردە كەشە ت م د باسشىلارى كەشكى استارىن ءىشتى. ول جەردە قاۋىن مەن قاربىزدى پيراميدا ۇلگىسىندە ءۇيىپ قويدى. بارلىق پيراميدالاردىڭ جالپى سالماعى - 10 توننا. ونىڭ ءبارىن تاجىكستاننىڭ سوعدى وبلىسىنان ارنايى ت م د باسشىلارى كەڭەسىنىڭ سامميتىنە الىپ كەلىپتى.

 

 ايتا كەتەيىك، كەشە ق ر پرەزيدەنتى نۇرسۇلتان نازاربايەۆ جۇمىس ساپارىمەن دۋشانبەگە كەلدى. مەملەكەت باسشىسى اۋەجايدا تۇسكەن بويدا «كوحي سامون» رەزيدەنسياسىنا بارىپ، تاجىكستان پرەزيدەنتى ەمومالي راحمونمەن كەزدەستى.

اۆتور: ارمان اسقاروۆ