داۋرەن ابايەۆ مەكتەپكە حيدجاب كيۋگە قاتىستى پىكىر ءبىلدىردى
باعدارلاما بارىسىندا ونىڭ جۇرگىزۋشىسى تۇركىستان وبلىسىنا قاراستى اۋىلداردىڭ بىرىندەگى مەكتەپ وقۋشىلارىنىڭ ساباققا حيدجاب كيىپ كەلۋىنە جانە سونىڭ توڭىرەگىندە ورىن العان شۋعا قاتىستى داۋرەن ابايەۆتىڭ پىكىرىن سۇراعان بولاتىن.
«قازاقستاندا «ءبىلىم تۋرالى» زاڭعا سايكەس ورتا مەكتەپتەردە مىندەتتى مەكتەپ فورماسى ەنگىزىلگەن. مەكتەپ فورماسىن ساقتاۋ دەگەننىڭ ءوزى قانداي دا ءبىر اتريبۋتيكالاردى نەمەسە ەلەمەنتتەردى، ونىڭ ىشىندە ءدىني دە پايدالانباۋ دەگەندى بىلدىرەدى. ياعني، زاڭ ساباققا تەك قانا حيدجابپەن نەمەسە ورامالمەن عانا ەمەس، سونىمەن بىرگە قانداي دا سۋبمادەني سيپاتتاعى كيىممەن بارۋعا شەكتەۋ قويادى. اۋدان اكىمشىلىگى مەن مەكتەپ باسشىلىعى قۇقىقتىق اياسىندا عانا ارەكەت جاساعان. مەنىڭ بىلۋىمشە، اتا-انالارمەن ءتۇسىندىرۋ جۇمىستارى جۇرگىزىلگەن جانە وقۋشىلار مەكتەپكە حيدجابپەن بارۋلارىن توقتاتقان»، - دەدى مينيستر باعدارلاما بارىسىندا.
سونىمەن قاتار ول ءدىني قۇقىققا نۇقسان كەلۋى تۋرالى اڭگىمەنىڭ بۇل ورايدا ورىنسىز ەكەندىگىن باسا ايتتى.
«بىردەن بۇل ماسەلەگە سوڭعى نۇكتە قويايىق. ءسوز قانداي دا ءبىر ءدىندى كەمسىتۋ، وعان قوسا ءدىني سەنىمگە نۇقسان كەلتىرۋ جايىندا بولىپ وتىرعان جوق. ءبىلىم بەرۋ مەكەمەسىنەن تىسقارى اركىم قالاۋىنشا كيىنۋگە ەرىكتى. قازاقستاندا ءدىني نانىم-سەنىمگە بىرەگەي ءارى وتە قولايلى احۋال قالىپتاسقان، مەنىڭشە، ونىمەن ەشكىم دە داۋلاسا المايدى. كونستيتۋتسياعا سايكەس مەملەكەتىمىز زايىرلى سانالادى. بۇل ءسوزدىڭ ءوزى مەملەكەتتىڭ دىننەن بولەك ەكەندىگىن بىلدىرەدى. ال مەكتەپ - بۇل ەڭ الدىمەن مەملەكەتتىك مەكەمە»، - دەدى داۋرەن ابايەۆ.
