قازاقستان جولدارىن جوندەۋگە كومىر پايدالانىلادى

اقتوبە. قازاقپارات - قازاقستاننىڭ اۆتوجولدارىن جوندەۋگە قاراپايىم كومىر پايدالانىلۋى مۇمكىن. قازاقستان جول عىلىمي-زەرتتەۋ ينستيتۋتى جاڭا عىلىمي جاڭالىقتى تانىستىرۋعا دايىندالىپ جاتىر، دەپ حابارلايدى قازاقپارات ءتىلشىسى.

اقتوبەدە «جول سالاسىنداعى يننوۆاتسيالىق تەحنولوگيالاردى قولدانۋ» تاقىرىبىندا سەمينار ءوتتى. سەمينارعا ەلىمىزدىڭ التى وبلىسىنان بىرنەشە مەملەكەتتىك قىزمەتكەر مەن مەردىگەر كومپانيا وكىلدەرى قاتىستى.

اۆتوجولدى سالۋ جانە جوندەۋ كەزىندەگى قولدانىلاتىن ماتەريالدار، كۇكىرت اسفالتبەتون، رەزەڭكە اسفالتبەتون سەكىلدى قوسپالار تۋرالى ايتىلدى. قازاقستان ءۇشىن كومىردەن جاسالعان قوسپامەن جول جوندەۋ ۇلكەن جاڭالىق بولماق. جاڭا جەتىستىك قاراشا ايىندا تانىستىرىلادى.

«نانوتەحنولوگيانى پايدالانىپ، كومىر مەن بيتۋمدى ارالاستىرامىز، جول جوندەيمىز. كومىر ينەنىڭ جاسۋىنداي بولشەككە بولىنگەن كەزدە جابىسقىش بولادى. بۇل - قازاقستان عالىمدارى اشقان جاڭالىق. الەمدىك تاجىريبەدە بولعان، ءبىراق ۇلكەن ناتيجە الا المادى. سەبەبى، نانوتەحنولوگيانى پايدالانعاندا جەتىستىككە جەتە المادى، عالىمدار تۇسىندىرمەدى. ءبىز ايتارلىقتاي ناتيجەگە قول جەتكىزدىك. پاتەنت الىپ، عىلىمي جاڭالىق رەتىندە جاريالايمىز. بۇل تەحنولوگيانى اكادەميك ايسۇلتان قالىبايەۆ ومىرگە اكەلدى. وتكەن جىلى كەلىپ، بيتۋمعا سالىپ، تاجىريبەدەن وتكىزۋگە كەڭەس بەردى. ءبىز قاراعاندىنىڭ كومىرىن پايدالانامىز»، - دەدى «قازاقستان جول عىلىمي-زەرتتەۋ ينستيتۋتى» ا ق پرەزيدەنتى باعدات تەلتايەۆ.

سونىمەن قاتار، ەسكى اسفالت جابىندىسىن قىرىپ الىپ، قوسپامەن قايتا توسەۋ تەحنولوگياسى قولدانىسقا ەندى.

«قازاقستان جول عىلىمي-زەرتتەۋ ينستيتۋتىمەن بىرگە اقتوبە-بولگاركا-شۇبارقۇدىق جولىن سالىپ جاتىرمىز. ءۇش ۋچاسكەگە ءبولىپ، كاسپي بيتۋمىن پايدالاندىق. ءارى قىتاي، رەسەي، قازاقستان پوليمەرى قوسىلدى. ەندى قىستىڭ ايازى مەن كوكتەمنىڭ جاڭبىرىنا توزىمدىلىگى تەكسەرىلەدى. تاجىريبە قورىتىندىسى 2019-جىلى بەلگىلى بولادى»، - دەيدى وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ايازباي وسمانعاليەۆ.

ايتا كەتەيىك، ەلىمىز بويىنشا استانا-بۋراباي تاسجولىنا سەمەنتبەتون ءادىسى قولدانىلدى. بۇل ءادىس «باتىس قىتاي - باتىس ەۋروپا» حالىقارالىق ءدالىزىن سالۋ كەزىندە دە پايدالانىلدى. جالپى، سوڭعى 10 جىلدا جول سالۋ جۇمىستارىندا 30 دان استام جاڭا تەحنولوگيا كادەگە جاراتىلدى.

ەلىمىزدە رەسپۋبليكالىق ماڭىزى بار 24 مىڭ شاقىرىم جول بار. ونىڭ 80-85 پايىزى جاقسى ساقتالعان.

«قازاقستان بيتۋمعا تاۋەلدى ەمەس. جىلىنا 700-800 توننا بيتۋم قولدانىلادى. ءبارىن ينستيتۋت ءوز باقىلاۋىنا العان. بيتۋم ناشار بولسا، جول قۇرىلىسىنا پايدالانبايمىز. تەك بيتۋمدى تاسىمالداۋ مەن ساقتاۋ تەحنولوگياسى ساقتالماي، جول قۇرىلىسى سىنعا ىلىگەدى»، - دەدى باعدات تەلتايەۆ.