تۇركىستان وبلىسىندا تەڭدەسى جوق ماقتا وڭدەۋ زاۋىتى ىسكە قوسىلادى

استانا. قازاقپارات - تۇركىستان وبلىسى شاردارا اۋدانىندا ماقتا وڭدەۋ زاۋىتىنىڭ قۇرىلىسى اياقتالۋعا جاقىن. ەلىمىز بويىنشا تەڭدەسى جوق كاسىپورىن -  سينگاپۋر مەن قازاقستاننىڭ بىرلەسكەن جوباسى.

 امەريكا مەن قىتايدىڭ ەڭ وزىق تەحنولوگيالارىمەن جابدىقتالعان زاۋىت تاۋلىگىنە 600 توننا ءشيتتى ماقتا وڭدەيدى. ودان 200 توننا تالشىقتى ماقتا شىعارادى. قازىر قۇرىلىس الاڭىندا 300-دەن اسا ادام ەڭبەك ەتىپ جاتىر.

 يندۋستريالدى- يننوۆاتسيالىق دامۋ باعدارلاماسى اياسىندا ىسكە اسىرىلىپ جاتقان جوبانىڭ جالپى قۇنى -  10 ميلليون ا ق ش دوللارى. زاۋىتتىڭ قۇرىلىسى قازان ايىنىڭ ورتاسىندا تولىق اياقتالىپ، پايدالانۋعا بەرىلەدى. ول كەزدە 150 ادامعا تۇراقتى جۇمىس ورىندارى اشىلادى دەپ جوسپارلانۋدا. بۇگىنگى تاڭدا شاردارالىق شارۋالار 25 مىڭ گەكتار القاپتان اق التىن تەرۋدە. قازىردىڭ وزىندە العاشقى تەرىمدى اياقتاپ قالعان ەڭبەككەرلەردىڭ جيىن- تەرىم ناۋقانى كۇن وتكەن سايىن قارقىن الىپ كەلەدى.

جانعازى وسپانوۆ، زاۋىتتىڭ قوندىرعىلار قويۋ بويىنشا باس مامانى:

 - بۇل جەردە شيكىزاتتى تازالاپ، كەپتىرىپ، ودان كەيىن وڭدەپ، تالشىعىن ءبولىپ الىپ، دايىن ءونىم شىعارىلادى. بۇگىنگى كۇنى شارۋالارعا اقشا تارقاتىپ، 10 مىڭ گەكتارعا جۋىق جەرگە ماقتا ەكتىرىپ جاتىرمىز. كەلەسى جىلدان باستاپ 30-40 ميلليون دوللار شارۋالارعا اقشا ءبولىپ، ماقتا ەكتىرەمىز. تەحنيكاسىن الۋىنا كومەكتەسەمىز.

 قايرات جولدىباي، شاردارا اۋدانى اكىمىنىڭ ورىنباسارى:

- بيىلعى جىلدىڭ وزىندە 24500 گەكتار جەرگە ماقتا داقىلى ەگىلدى. جىلدان- جىلعا جاڭا تەحنولوگيالار ەندىرۋ ارقىلى ماقتانىڭ ونىمدىلىگى دە ارتىپ كەلە جاتىر. بيىل 28 سەنتنەردەن ارتىق ءونىم الادى دەپ جوسپارلاپ، 70 مىڭ تونناعا جۋىق ماقتا جينايمىز دەگەن جوسپار بار.

www.24.kz