اقان ساتايەۆ «توميريس» فيلمى ءتۇسىرىلىپ بىتكەنىن ايتتى
«دوستار، ءبىز «توميريس» فيلمىنىڭ ءتۇسىرىلىمىن اياقتادىق. وسىنداي تاماشا وقيعانى ءتۇسىرۋ - مەن ءۇشىن ۇلكەن ابىروي. سونداي- اق، كورەرمەننىڭ الدىندا ۇلكەن جاۋاپكەرشىلىك بار ەكەنىن دە بىلەمىن... بىزدەر - مەن جانە مەنىڭ كوماندام، بارلىق اكتەرلەر بار كۇش- جىگەرىمىزدى سالىپ، ۇلكەن ماحابباتپەن جۇمىس ىستەدىك! ءتۇسىرىلىم توبىن، بارلىق اكتەرلەردى، كومەكتەسىپ، قولداۋ كورسەتكەن جانداردى قۇتتىقتايمىن جانە العىس ايتامىن»، - دەپ جازدى اقان ساتايەۆ فەيسبۋكتەگى پاراقشاسىنا.
رەجيسسەر اتاپ وتكەندەي، بۇل جوبانىڭ ورنى ەرەكشە.
«ءار فيلم ماعان قىمبات!»، - دەپ تۇيىندەدى ا. ساتايەۆ.
ساق پاتشايىمى جايىنداعى «توميريس» اۋقىمدى تاريحي جوباسى 2017 -جىلدىڭ ساۋىرىندە باستالعان ەدى. فيلمدى ق ر مادەنيەت جانە سپورت مينيسترلىگىنىڭ تاپسىرىسىمەن شاكەن ايمانوۆ اتىنداعى «قازاقفيلم» ا ق «ساتاي فيلم» كينوكومپانياسى ءتۇسىردى. باس پروديۋسەر - ءاليا نازاربايەۆا («اناعا اپارار جول» ). فيلمنىڭ قويۋشى رەجيسسەرى - اقان ساتايەۆ («رەكەتير»، «اداسقان»، «ليكۆيداتور»، «جاۋجۇرەك مىڭ بالا»، «اناعا اپارار جول»).
كارتينا ءبىزدىڭ داۋىرىمىزگە دەيىنگى VI عاسىرداعى وقيعالار جايىندا سىر شەرتەدى. ول كەزەڭدە ساق تايپالارى ۇلى دالانى جاۋلاپ الۋعا كەلگەن پارسى پاتشاسى 2 كيرگە ويسىراتا تويتارىس بەرەدى. ساق اسكەرىنىڭ قولباسشىسى، ماسساگەتتەردىڭ پاتشايىمى تۇمار (توميريس) بولدى.
«بۇل شايقاس، مەنىڭشە، حالىقتار اراسىنداعى ەڭ سۇراپىل سوعىس بولدى»، - دەپ جازدى ەجەلگى گرەك تاريحشىسى گەرودوت. فيلم سسەنارييىن ازىرلەگەن كەزدە ونىڭ ەڭبەكتەرى دە پايدالانىلدى.
