20:38, 25 - قىركۇيەك 2018 | GMT +6
وزبەكستاندا جول اپاتىن ۆيدەو تىركەگىشكە تۇسىرگەندەرگە اقى تولەنەتىن بولدى
استانا. قازاقپارات - كەلەسى جىلدان باستاپ وزبەكستاندا ۆيدەو تىركەگىشكە جول ەرەجەسىن بۇزعانداردى ءتۇسىرىپ الىپ، ۆيدەوسىن ۇسىنعاندارعا اقى تولەنەتىن بولادى، دەپ حابارلايدى قازاقپارات ءتىلشىسى.
ەل ۇكىمەتىنىڭ قاۋلىسىنا سايكەس، سىياقى سوماسى ەڭ تومەنگى جالاقىنىڭ %5 قۇرايدى. بۇگىنگى تاڭدا وزبەكستاندا ەڭ تومەنگى جالاقى 184300 سۋم، %5 دەگەنىمىز - 9215 سۋم (407 تەڭگە).
سونداي-اق، جول اپاتىنىڭ ۆيدەو تاسپاسىن ۇسىنعاندارعا قاتىستى جەكە مالىمەتتەردى تاراتۋعا تىيىم سالىنادى.
وزبەكستاندا اۆتوكولىكتەرگە ۆيدەو تىركەگىشتەر ورناتۋ مىندەتتەلەدى. قۇقىق بۇزۋشىلىق تۋرالى ۆيدەو تاسپا پروتسەسسۋالدىق شەشىم قابىلداعاندا قارالادى.
وزگەرىس 2019-جىلدىڭ 1- شىلدەسىنەن ەنگىزىلەدى.