دانيال احمەتوۆ وبلىستىڭ ءبىرقاتار اۋداندارىنداعى جول قۇرىلىسىنىڭ ساپاسىن سىنعا الدى

وسكەمەن. قازاقپارات - زىريان اۋدانىنا جۇمىس ساپارى بارىسىندا شىعىس قازاقستان وبلىسىنىڭ اكىمى دانيال احمەتوۆ زىريانسك مەن سەرەبريانسك قالالارىنىڭ اكىمشىلىك ورتالىعىنىڭ جولدارىن جوندەۋ جۇمىستارىن سىنعا الدى، دەپ حابارلايدى «قازاقپارات» ح ا ا اقپارتتىق ورتالىققا سىلتەمە جاساپ.

وسىعان دەيىن حابارلانعانىنداي، بيىلعى جىلى زىريانوۆ اۋدانىنىڭ جولدارىن جوندەۋگە وبلىس بيۋدجەتىنەن 613 ملن تەڭگە بولىنگەن بولاتىن. جول ساپاسىن تەكسەرۋ كەزىندە دانيال احمەتوۆ سەرەبريانسك قالاسىنداعى جوندەۋ جۇمىستارىنىڭ بارىسىن سىنعا الدى.

«ءبىرىنشى كەزەكتە جوندەۋ جۇمىستارىن ادامدار ەڭ كوپ جۇرەتىن ايماقتارعا جاساۋ كەرەك ەدى جانە بۇل باعىتتاعى جۇمىستاردى جىلدىڭ العاشقى جارتىسىندا اياقتاۋ قاجەت بولاتىن. جوندەۋ جۇمىستارىن جەدەلدەتۋ قاجەت، كەلەسى جىلدىڭ 1- ماۋسىمىنا دەيىن جۇمىستار تولىق اياقتالىپ ءبىتۋى كەرەك»، - دەدى ش ق و اكىمى.

بۇعان قوسا، اكىم جەرگىلىكتى دەپۋتاتتارعا زىريانوۆسك قالاسىنداعى جولدار مەن كەيبىر ۇيلەردىڭ اۋلالارىن اباتتاندىرۋ جۇمىستارى تالاپقا ساي ەمەستىگىن ايتتى.

«جولدار مەن شاعىن اۋدانداردى جانە كوشەلەردى اباتتاندىرۋمەن دەپۋتاتتار اينالىسۋلارى كەرەك. حالىق سىزدەردى تاڭدادى، الايدا بۇل سىزدەر قالاي بولسا سولاي ارەكەت ەتە بەرۋلەرىڭىزگە بولادى دەگەندى بىلدىرمەيدى. شاعىن اۋدانداردى تارتىپكە كەلتىرىپ، تۇرعىن ءۇي- كوممۋنالدىق شارۋاشىلىق سالاسىنىڭ جۇمىسىن ءجىتى قاداعالاڭىزدار»، - دەدى وبلىس اكىمى.

اۋدارما: ايدار وسپاناليەۆ