جاڭا كينوستۋديا «استانا فيلم» قاي جەردە ورنالاساتىنى بەلگىلى بولدى

استانا. قازاقپارات - پارلامەنت ءماجىلىسىنىڭ جالپى وتىرىسىندا ق ر مادەنيەت جانە سپورت ءمينيسترى ارىستانبەك مۇحامەدي ۇلى «استانا فيلم» جاڭا كينوستۋدياسى قۇرىلاتىنىن ءمالىم ەتتى، دەپ حابارلايدى قازاقپارات.

«استانا فيلم» كينوستۋدياسىن قۇرۋعا قاتىستى مەملەكەت باسشىسىنىڭ ءتيىستى تاپسىرماسى بار. قازىرگى كەزدە تەحنيكالىق- ەكونوميكالىق نەگىزدەمەنى ازىرلەۋمەن اينالىسىپ جاتىرمىز. بىزگە وسىنداي كينوستۋديانى قۇرۋ قاجەتتىلىگى بايقالىپ وتىر. ماسەلەن، ۆەنگريا، چەحيا سەكىلدى اۋماعى جاعىنان شاعىن ەلدەردىڭ وزىندە بىرنەشە رەسمي كينوستۋديالار بار»، - دەدى مينيستر.

ونىڭ سوزىنە قاراعاندا، قازاقستانداعى كينويندۋستريادا قارقىندى دامۋ پروتسەسى ءجۇرىپ جاتىر، سوندىقتان الداعى ۋاقىتتا «قازاق فيلم» اۋقىمدى جۇمىستاردى يگەرە الماۋى مۇمكىن.

«مەنىڭ ويىمشا، جاڭا ستۋديا ەكسپو- قالاشىق ماڭىندا ورنالاسادى. قازىرگى كەزدە ساۋلەت ماسەلەسى ماڭىزدى بولىپ تۇر. سەبەبى الەمدىك كينوستۋديالارعا تۋريستەر كوپتەپ باراتىنى بەلگىلى. ياعني كينووندىرىس بيزنەسپەن قاتار جۇرگىزىلۋى ءتيىس. ەگەر دە بيىل جوبالىق- سمەتالىق قۇجاتتامانى اياقتاساق، وندا الداعى جىلى قۇرىلىستىڭ باستالۋىنا ءوتىنىم جىبەرە الامىز»، - دەدى ارىستانبەك مۇحامەدي ۇلى تىلشىلەردىڭ سۇراعىنا جاۋاپ بەرە وتىرىپ.

اۆتور: رۋسلان عابباسوۆ