زەينەتاقى جيناقتارى قايدا ينۆەستيتسيالانادى

 استانا. قازاقپارات - بۇگىن سەنات دەپۋتاتتارىمەن بولعان كەزدەسۋدە «ءبىرىڭعاي جيناقتاۋشى زەينەتاقى قورى» ا ق باسقارما ءتورايىمى ءنۇربۇبى ناۋرىزبايەۆا زەينەتاقى اكتيۆتەرى پورتفەلىنىڭ قۇرىلىمى تۋرالى ايتتى، دەپ حابارلايدى قازاقپارات ءتىلشىسى.

«2018 -جىلعى 1 - شىلدەدەگى جاعداي بويىنشا پورتفەلدىڭ نەگىزگى ۇلەسى قازاقستاننىڭ مەملەكەتتىك باعالى قاعازدارىنا (46,7 پايىز) ورنالاستىرىلدى. 19 پايىزى قازاقستاندىق ەكىنشى دەڭگەيلى بانكتەردىڭ قۇندى قاعازدارىنا ينۆەستيتسيالاندى. ۆاليۋتالىق قۇرىلىم تۇرعىسىندا پورتفەلدىڭ 68 پايىزى تەڭگەلىك تەتىكتەرگە، 32 پايىزى شەتەل مەملەكەتتەرىنىڭ ۆاليۋتالارىنا سالىندى» ، - دەدى ناۋرىزبايەۆا.

 ونىڭ سوزىنە قاراعاندا، ب ج ز ق زەينەتاقى اكتيۆتەرىنە ەسەپتەلگەن ينۆەستيتسيالىق كىرىس بيىلعى ءبىرىنشى جارتىجىلدىقتا 378 183 ميلليون تەڭگەنى قۇراپ، بۇل كورسەتكىش وتكەن جىلدىڭ سايكەس كەزەڭىنەن 70 پايىزعا ارتىق.

بۇدان بۇرىن حابارلانعانداي، قازاقستاندا زەينەتاقى جيناقتارى بويىنشا ەرلەردىڭ ۇلەسى باسىم.

سونىمەن قاتار، ن. ناۋرىزبايەۆا بيىلعى شىلدەنىڭ باسىندا قازاقستاندىقتاردىڭ زەينەتاقى جيناقتارىنىڭ كولەمى 8,4 تىريلليون تەڭگەگە جەتكەنىن ايتتى.