قازاق ۇلتتىق مەديتسينالىق ۋنيۆەرسيتەتى جەتى جىلدىق وقۋ مەرزىمىن قىسقارتادى

استانا. قازاقپارات - اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتىنىڭ رەكتورى تالعات نۇرعوجين قازاقپارات تىلشىسىنە ج و و- عا ەنگىزىلىپ جاتقان مەديتسينالىق ءبىلىم بەرۋدىڭ جاڭا ۇلگىسى تۋرالى ايتىپ بەردى.

«21- عاسىردا مەديتسينالىق ءبىلىم بەرۋدىڭ تۇبەگەيلى جاڭا تۇجىرىمدامالىق ۇلگىسى پايدا بولدى، مۇندا «بۇكىل ومىرگە جەتكىلىكتى ءبىلىم بەرۋ» ماقساتىنىڭ ورنىنا «ءومىر بويى ءبىلىم بەرۋ» اتتى جاڭا ءتاسىل جۇزەگە اسىرىلۋدا. ياعني، مەديتسينالىق ءبىلىم بەرۋ مەديتسينالىق ج و و- عا تۇسكەندە باستالادى دا، مەديتسينالىق قىزمەت توقتاعاندا عانا اياقتالادى. ءبىز تاجىريبەلىك داعدىلاردى ناقتى جاعدايدا ۇيرەتۋگە ەرەكشە ءمان بەرە وتىرىپ، مەديتسينالىق ءبىلىمدى، عىلىمدى جانە كلينيكالىق تاجىريبەنى بىرىكتىرەتىن دەنساۋلىق پەن عىلىمنىڭ اكادەميالىق جۇيەسىن دامىتىپ جاتىرمىز»، - دەپ اتاپ ءوتتى ول.

تالعات نۇرعوجين بولاشاق مەديتسينا قىزمەتكەرلەرىنىڭ اقپاراتتى ءوز بەتىمەن الىپ جانە تالداۋ جاساپ، دەرەكتەردى دۇرىس باعالاي الۋى ءۇشىن ولارعا اقپاراتتىق تەحنولوگيالار مەن رەسۋرستار مۇمكىندىگىن پايدالانۋدى ۇيرەتۋ قاجەت دەپ ەسەپتەيدى.

ونىڭ پىكىرىنشە، ءبىلىم بەرۋ باعدارلامالارىن جۇيەلى تۇردە جەتىلدىرۋ ءبىلىم جونىندەگى اقپارات كولەمىنىڭ ۇلعايۋىنا بايلانىستى ستۋدەنتتەرگە جۇكتەمەنى ارتتىرماۋى قاجەت.

«سوندىقتان، ەۋروپا ەلدەردىڭ تاجىريبەسىنە سۇيەنە وتىرىپ، ءبىز ۋنيۆەرسيتەتتەگى وقۋ ۇزاقتىعىن جەتى جىلدان التى جىلعا دەيىن قىسقارتۋدى جوسپارلاپ وتىرمىز. ج و و تۇلەگى دارىگەر ديپلوممەن بىرگە عىلىم ماگيسترى دارەجەسىن دە الا الادى»، - دەپ ءتۇسىندىردى ۋنيۆەرسيتەت باسشىسى.

ونىڭ ايتۋىنشا، باستى نازار رەزيدەنتۋرا باعدارلاماسىنا، كلينيكالىق ماماندىقتار بويىنشا جوعارى وقۋ ورنىنان كەيىنگى ءبىلىم بەرۋگە اۋدارىلىپ وتىر.

«بىرىنشىدەن، ۋنيۆەرسيتەت تۇلەكتەرىنىڭ باسىم بولىگى رەزيدەنتۋراعا بارۋى ءتيىس دەپ ەسەپتەيمىز، ياعني ەمدەۋ پروتسەسىنە جىبەرىلەتىن بارلىق دارىگەرلەرگە رەزيدەنتۋرانى اياقتاۋ تالابى قويىلۋى كەرەك. ەكىنشىدەن، رەزيدەنتتەر تاجىريبەدەن ءوتۋى كەرەك، ياعني ناۋقاستاردى ەمدەۋى كەرەك. دامىعان ەلدەردە ەمدەۋدىڭ ۇلكەن كولەمى رەزيدەنتتەرگە جۇكتەلەدى. ماسەلەن، ا ق ش- تا رەزيدەنتتەر اپتاسىنا 80 ساعات كلينيكادا جۇرەدى. امەريكالىق ارىپتەستەر رەزيدەنتتەرگە: «ەگەر مۇنى جاساماساڭىز، جاقسى دارىگەر بولا المايسىز» دەيدى. سوندىقتان، ءبىزدىڭ نەگىزگى مىندەتىمىز - رەزيدەنتتەردى وپەراتسيالىق بولمەلەر مەن پالاتالارعا كوپتەپ جىبەرۋ»، - دەدى رەكتور.

سونىمەن بىرگە، تالعات نۇرعوجين ۋنيۆەرسيتەت ۇجىمى مەن ستۋدەنتتەرىنىڭ نەگىزگى مىندەتتەرىنىڭ ءبىرى - قازىرگى جىلدام وزگەرەتىن جاعدايلارعا بەيىمدەلۋ ءۇشىن جاڭا قيىندىقتارعا بەيىمدەلە الۋ ەكەندىگىن اتاپ ءوتتى.

«جاقىن ارادا قۇزىرەتتىلىكتى دامىتۋعا، مەديتسينالىق كومەك كورسەتۋ جۇيەسىندەگى سىرتقى جاعدايلارعا تەز بەيىمدەلۋگە جانە دەنساۋلىق ساقتاۋ تەحنولوگيالارىن دامىتۋداعى الەمدىك تەندەنسيالاردى كورسەتۋگە باعىتتالعان ءبىلىم بەرۋ باعدارلامالارى - قازۇمۋ- داعى جوعارى مەديتسينالىق ءبىلىم بەرۋدىڭ نەگىزى بولۋى ءتيىس. بۇگىندە بۇل - جەكە دەربەستەندىرىلگەن تەلەمەديتسينا، بيوينفورماتيكا، دياگنوستيكا مەن جاساندى ينتەللەكتتى قولدانۋ ارقىلى ەمدەۋ، رەگەنەراتسيالاۋ، اۋگمەنتاتسيا جانە بيوگەرەنتولوگيا. مەديتسينالىق تەحنولوگيالاردى دامىتۋدىڭ كوپتەگەن باعىتتارى «دەربەستەندىرىلگەن مەديتسينا» ۇعىمىمەن بىرىگەدى، ياعني وندا ناۋقاستىڭ پروفيلاكتيكا، دياگنوستيكا جانە ەمدەۋدەگى جەكە ەرەكشەلىكتەرى ەسكەرىلگەن. اقپاراتتىق تەحنولوگيالار مەن گەنەتيكالىق زەرتتەۋلەردىڭ دامۋى ارقىلى دەربەستەندىرىلگەن مەديتسينا شىندىققا اينالدى. ىرگەلى جانە قولدانبالى عىلىمي زەرتتەۋلەردىڭ ناتيجەلەرىنە نەگىزدەلگەن جەكە مەديتسيناداعى قوعام قاجەتتىلىكتەرىن ەسكەرۋ ارقىلى ەلىمىزدەگى جوعارى مەديتسينالىق مەكتەپتى دامىتۋ قاجەت»، - دەپ ءوز ءسوزىن تۇيىندەدى تالعات نۇرعوجين.

مەديتسينا ماماندارىنىڭ ۇستاحاناسىنا اينالعان قازۇمۋ- دا بۇگىندە 10 مىڭعا جۋىق ستۋدەنتتەر، ينتەرندەر، رەزيدەنتتەر، ماگيسترانتتار مەن PhD دوكتورانتتارى ءبىلىم الادى. ولاردىڭ اراسىندا 8 ەلدەن كەلگەن 1000-نان استام شەتەلدىك ستۋدەنتتەر بار. بيىل ۋنيۆەرسيتەتتىڭ قۇرىلعانىنا 88 جىل تولادى.

فوتو: kaznmu.kz

اۆتور: ايجان سەرىكجان قىزى