11:31, 17 - قىركۇيەك 2018 | GMT +5
ب ۇ ۇ نورۆەگيانى ادامي دامۋى ەڭ جوعارى ەل دەپ اتادى
استانا. قازاقپارات - نورۆەگيا، شۆەيتساريا مەن اۋستراليا ب ۇ ۇ تۇجىرىمى بويىنشا ادامي دامۋ دەڭگەيى ەڭ جوعارى ەلدەردىڭ العاشقى ۇشتىگىنە ەندى، دەپ حابارلايدى قازاقپارات.
بۇعان حالىقارالىق ۇيىمنىڭ جۇما كۇنى جاريا ەتكەن «ادامي دامۋ يندەكستەرى مەن ينديكاتورلارى» بايانداماسىندا كەلتىرىلگەن دەرەكتەر دالەل بولا الادى.
باياندامادا 189 ەلدىڭ رەيتينگى ۇسىنىلعان. ولار تومەندەگىدەي پارامەتر بويىنشا باعالانعان: ءومىر ءسۇرۋ ۇزاقتىعى، ورتاشا ءبىلىم بەرۋ ۇزاقتىعى، ادام باسىنا شاققانداعى جالپى ۇلتتىق ءونىم.
سونداي- اق، العاشقى وندىققا يرلانديا، گەرمانيا، يسلانديا، گونكونگ، شۆەتسيا، سينگاپۋر مەن نيدەرلاندى كىرگەن. رەيتينگتى نيگەر، ورتالىق افريكا رەسپۋبليكاسى، وڭتۇستىك سۋدان، چاد جانە بۋرۋندي تۇيىقتاپ تۇر.
