استانادا وتكەن ماروفوندا بەس مىڭعا تارتا قاتىسۋشى باسەكەلەستى
بيىلعى مارافونعا 5 مىڭعا تارتا ادام قاتىستى. ايتا كەتەرلىگى، قاتىسقان ادامداردىڭ بەستەن ءبىرى مارافوندى تولىق جۇگىرىپ ءوتتى. باسەكەگە قازاقستاندىقتارمەن بىرگە گەرمانيا، رەسەي، جاپونيا، يتاليا، وزبەكستان، ب ا ءا، شۆەتسيا، وڭتۇستىك كورەيا، ۇلى بريتانيا، ا ق ش، قىرعىز رەسپۋبليكاسى، فرانسيا، تۇركيا، اۋستراليا، كەنيا، گرۋزيا، ليۋكسەمبۋرگ پەن يسپانيانىڭ اتلەتتەرى كەلدى. جارىس جولىنا شىققان 18 جاستان اسقان سپورتشىلارعا 42,2 جانە 18 شاقىرىمدى (جاس ايىرماشىلىعى بويىنشا) باعىندىرۋ مىندەتتەلدى.
«ءبىزدىڭ كلۋبقا مۇشە ادامداردىڭ ءبارى دە بۇگىن جارىس جولىنا شىقتى. 10 شاقىرىمدى جۇگىرىپ وتتىك. وسىنداي ىزگى ءارى دەنساۋلىققا پايدالى شارالار سوڭعى جىلدارى ءجيى وتكىزىلىپ كەلەدى. ءبىزدىڭ ءبارىمىز وسى مارافونعا قاتىسا وتىرىپ، سالاۋاتتى ءومىر سالتىن ناسيحاتتاعىمىز كەلەدى»، - دەيدى استانا اكىمدىگىنىڭ «جىگەر» سپورت كلۋبى باسشىسىنىڭ ورىنباسارى قۋانىش سەيتماعامبەتوۆ.
كاسىبي سپورتشىلارمەن بىرگە بۇل مارافونعا قاراپايىم ادامدار دا كەلىپتى. ماسەلەن، استانا قالاسىنىڭ تۇرعىنى ءمادي ايمانبەكوۆ وسى جارىس الدىندا ءبىرشاما دايىندالعانىن ايتادى.
«كۇندە تاڭەرتەڭ جۇگىرۋدى ادەتىمە اينالدىرعانمىن. مارافوننىڭ وتەتىنىن ءبىلىپ، بۇگىن ارنايى جارىسقا شىقتىم. الەمنىڭ ۇزدىك مارافونشىلارىمەن بىرگە ءبىر جولدا ونەر كورسەتكەن ەرەكشە اسەر سىيلايدى ەكەن. البەتتە، ولارمەن باسەكەلەسۋ وڭاي ەمەس. ورىن الماسام دا، ءوز- ءوزىمدى جىگەرلەندىرە ءتۇستىم»، - دەيدى قالا تۇرعىنى.
Astana Marathon 2018 باعدارى قالانىڭ نەگىزگى ايتۋلى ورىندارىن كورسەتۋ ءۇشىن ارنايى دايىندالعان. ناقتىراق ايتقاندا، قاتىسۋشىلار بەيبىتشىلىك جانە كەلىسىم سارايى مەن حازىرەت سۇلتان مەشىتى، بايتەرەك، نازاربايەۆ ۋنيۆەرسيتەتى مەن استانا ارەنانى جاناي ءوتىپ جۇگىردى. ديستانسيانىڭ ءاربىر بەسىنشى شاقىرىمىندا قاتىسۋشىلارعا ارنالىپ سۋ بەرىلەتىن ورىندار ازىرلەندى.
ەسكە سالا كەتسەك، بيىل Astana Marathon حالىقارالىق مارافوندار جانە جۇگىرۋلەر قاۋىمداستىعىنا (AIMS) ەنىپ، استاناداعى جۇگىرۋ مارافونى حالىقارالىق جەڭىل اتلەتيكا فەدەراتسيالارى قاۋىمداستىعىنىڭ Bronze Label قۇرمەتتى سەرتيفيكاتىن الۋعا ۇمىتتەنىپ وتىر. كوپتەگەن شەتەلدىك اگەنتتەردىڭ Astana Marathon-دى وتەتىن اۋماقتاعى جەردىڭ جازىقتىعىنا جانە كليماتىنا بايلانىستى تاڭدايدى، ويتكەنى بۇل جاعدايلار جۇگىرۋشىلەرگە قاشىقتىقتى وڭاي باعىندىرۋعا جانە الەمدىك رەكوردتار ورناتۋعا مۇمكىندىك بەرەدى.
Astana Marathon-نىڭ باستالۋىنا نەگىز بولعان قايىرىمدىلىق جۇگىرۋلەر 2009 -جىلدان بەرى وتكىزىلىپ كەلەدى. وسى ۋاقىت ىشىندە قازاقستاندىق قايىرىمدىلىق ۇيىمدارعا جارىستاردى وتكىزۋدەن جيناقتالعان 36 ميلليون تەڭگە قارجى اۋدارىلعان.
ايتا كەتەرلىگى، اتالمىش سايىستا قاتىسۋشىلار جاس ەرەكشەلىگى بويىنشا باق سىناسقان بولاتىن.
وسىلايشا، 42,2 شاقىرىمدىق جارىستا ءابسوليۋتتى ساناتتا ءبىرىنشى جانە ەكىنشى ورىندى كەنيادان كەلگەن ەريك كەرينگ (2:17:57) پەن روبەرت گايتو (2:22:30) ءبولىستى. ءۇشىنشى ورىندى قازاقستاندىق ءامىر بايتوقانوۆ (2:26:33) قاناعات تۇتتى.
ابسوليۋتتى ساناتتا ايەلدەر اراسىندا دا العاشقى ەكى ورىن كەنيالىقتارعا، اتاپ ايتقاندا سالينا دجەبەت (2:31:09) پەن ليۋسي ندۋنگۋداعا (2:33:12) بۇيىردى. ءۇشىنشى ورىندى قىرعىز رەسپۋبليكاسىنان كەلگەن يۋليا اندرەيەۆا (02:37:46) مىسە تۇتتى.
42,2 شاقىرىمدىق قاشىقتىقتا 18-39 جاس ارالىعىنداعى قاتىسۋشىلاردىڭ ىشىندە ءبىرىنشى ورىندى قىرعىزستاندىق جووداربەك كوچكونبايەۆ (2:28:47) السا، ەكىنشى ورىندى بەللور ياتور (2:30:24، كەنيا) مەن قازاقستان اتلەتى عالىمجان جۇمابايەۆ (2:32:01, قازاقستان) يەلەندى. 18-39 جاس ارالىعىنداعى ايەلدەر اراسىندا ءۇش ورىندى جاننا ماماجانوۆا (2:38:56، قازاقستان)، دانا ايدوسوۆا (2:47:19، قازاقستان) مەن مەرسي دجەليمو توو (2:50:16، كەنيا) ءوزارا ءبولىستى.
40-49 جاس ارالىعىنداعى اتلەتتەر كاتەگورياسىندا ءبىرىنشى ورىندى اسكەر قوجانوۆ (2:49:56, قازاقستان) ەنشىلەسە، ەكىنشى جانە ءۇشىنشى ورىنعا قازاقستاندىق اتلەتتەر يۋري ەگەر (2:53:07، قازاقستان) مەن ايبەك جوتەكوۆ (3:04:55) يە بولدى.
قىزدار اراسىندا اتالمىش كاتەگوريادا دا قازاقستاندىق اتلەتتەر نەللي مەدۆەديەۆا (3:54:58)، گيۋزال ۆاسيەۆا (4:02:59) مەن يننا ۆيشنياكوۆا (4:09:22) تۇعىردان كورىندى.
50-59 جاس ارالىعىنداعى سايىستا تاعى ءۇش قازاقستاندىق اتلەت پاۆەل برودا (2:55:31)، مەڭدىباي ءالىمعازينوۆ (3:01:17) پەن تالاپنۇر بايزاق (3:14:10) ءۇش ورىندى جەڭىپ الدى. اتالمىش كاتەگوريادا ءبىرىنشى ورىندا قازاقستاندىق ۆالەنتينا تيتوۆسكايا (4:21:19) يەلەندى.
60-69 جاس ارالىعىنداعى سپورتشىلاردىڭ ىشىندە ءۇش ورىن دا قازاقستاندىق سپورتشىلاردىڭ ەنشىسىنە بۇيىردى. اتاپ ايتقاندا، ءۇش ورىندى ۆلاديمير كريۆۋشكين (3:21:59)، قازىبەك بەكەيەۆ (3:32:10) پەن ۆالەري كۋليكوۆ (3:43:04) ءوزارا ءبولىستى. ايەلدەر اراسىندا ليۋبوۆ اسانوۆا (4:29:43) عانا اتالمىش قاشىقتىقتى باعىندىرىپ، ءبىرىنشى ورىنعا تابان تىرەدى.
70 جاستان جوعارى اتلەتتەردىڭ ىشىندە نيكولاي گريگوريەۆ (3:38:54) پەن قايىرباي ءسالىموۆ (4:01:35، ەكەۋى دە قازاقستاننان) ءبىرىنشى جانە ەكىنشى ورىننان كورىنسە، ايەلدەر اراسىندا بۇل قاشىقتىقتى امەلسين ميروشنيچەنكو (05:21:48) باعىندىرىپ، بيىك تۇعىردان كورىنىپ وتىر.
10 شاقىرىمدىق ابسوليۋتتى ساناتتا ەرلەر اراسىندا ءبىرىنشى ورىندى جانە ەكىنشى ورىندى كەنيالىقتار شادراك كوەچ (00:30:52)، كەننەت روتيچ (00:31:45) يەلەنسە، ءۇشىنشى ورىندى قازاقستاندىق الەكسەي گۋساروۆ (00:31:57) قاناعات تۇتتى.
ابسوليۋتتى ساناتتا ايەلدەر اراسىندا دا العاشقى ەكى ورىن كەنيالىقتاردىڭ - نوراح دجەرۋتو (00:32:04) مەن دەيزي دجەپكەمەيدەنىڭ (00:32:05) ۇلەسىندە. ءۇشىنشى ورىنعا قازاقستاندىق سۆەتلانا ساۋنينا (00:37:57) تابان تىرەدى.
42,2 شاقىرىمدىق ابسوليۋتتى ساناتتاعى ءبىرىنشى ورىن يەگەرلەرىنە 905000 تەڭگە، Air Astana كومپانياسىنىڭ كەز كەلگەن باعىتىنا تەگىن بيلەت، ەكسكليۋزيۆتى ساعات بەرىلدى. ال ەكىنشى ورىنعا 452500 تەڭگە مەن Air Astana كومپانياسىنىڭ كەز كەلگەن باعىتىنا تەگىن بيلەت، ءۇشىنشى ورىنعا 226250 تەڭگە تابىستالدى. 18-39، 40-49، 50-59، 60-69، 70 جاستان جوعارى جەڭىمپازدارعا ءبىرىنشى ورىنعا 50000 تەڭگە، ەكىنشى ورىنعا 40000 تەڭگە، ءۇشىنشى ورىنعا 30000 تەڭگە بەرىلدى.
10 شاقىرىمدىق جەڭىسكە كوتەرىلگەن سپورتشىلار ءۇشىن ءبىرىنشى ورىنعا 30000 تەڭگە، ەكىنشى ورىنعا 25000 تەڭگە، ءۇشىنشى ورىنعا 20000 تەڭگە تاپسىرىلدى.
اۆتور: ايان بەكەن ۇلى
