استانانىڭ ورتالىعىندا « گولوۆكين - چەمپيون» دەگەن ماڭدايشا جازۋى پايدا بولدى

استانا. قازاقپارات - ەلوردانىڭ ورتالىعىنداعى التى ءۇيدىڭ الدىندا «GGG - چەمپيون» جازباسىمەن ۇلكەن نەون جۇگىرتپە جولى پايدا بولدى، دەپ حابارلايدى قازاقپارات.

«GGG چەمپيون!!!! ماڭگىلىككە! بۇل جازۋ بۇگىن ساعان ارنالعان، گەنا!!!!»، - دەپ جازدى سارىارقا اۋدانىنىڭ اكىمى ارمان تۇرلىبەك.

الەۋمەتتىك جەلى پايدالانۋشىلارى ءوز پىكىرلەرىندە گەننادي گولوۆكين مانسابىنداعى العاشقى جەڭىلىسكە ۇشىراعانىنا قاراماستان، وسىنداي نازارعا لايىق ەكەنىن جازۋدا.

قازاقستان جۇرتشىلىعى مەن مەملەكەت قايراتكەرلەرى گەننادي گولوۆكينگە ۇلكەن قولداۋ كورسەتتى.

وسىلايشا، ق ر پارلامەنتى سەناتىنىڭ دەپۋتاتى قاسىم-جومارت توقايەۆ تۆيتتەرگە بىلاي دەپ جازعان: «ماعان دا گولوۆكين بۇل جەكپە-جەكتە ازداعان باسىمدىق تانىتىپ، جەڭگەندەي بولىپ كورىندى. الايدا تورەشىلەردىڭ پىكىرى وزگەشە بولىپ شىقتى، وعان قارسىلىق ءبىلدىرۋدىڭ ماڭىزى شامالى. GGG قازاقستاندى الەمدىك ارەنادا تانىتۋعا زور ۇلەس قوستى، سوندىقتان ماراپاتقا ابدەن لايىق!»

ال ق ر مادەنيەت جانە سپورت ءمينيسترى ارىستانبەك مۇحامەدي ۇلى قازاقستان حالقىنىڭ باتىرى گەناعا دەگەن ماحابباتى تاۋسىلمايتىنىن ايتتى. ءانشى ديماش قۇدايبەرگەن دە وتانداسىن رينگتەگى جەڭىلىسىنەن كەيىن قولداپ، ينستاگرام جەلىسىندە قازاقستاندى تانىتۋىنا قوسقان ۇلەسى ءۇشىن العىسىن ءبىلدىرىپ جازدى.

بۇعان دەيىن، گەننادي گولوۆكين مەن ساۋل «كانەلو» الۆارەستىڭ رەماتچى قارساڭىندا استاناداعى سامال شاعىن اۋدانىنىڭ ۇيلەرىندە «العا، GGG!» ، «ۆپەرەد، GGG!»  دەپ جازىلعان جاناتىن جۇگىرتپە جول پايدا بولعان ەدى.

ەسكە سالايىق، 15- قىركۇيەك كۇنى لاس-ۆەگاستەگى T- Mobile Arena-دا قازاقستاندىق گەننادي گولوۆكين مەن مەكسيكالىق بوكسشى ساۋل «كانەلو» الۆارەس قارىمتا جەكپە-جەك وتكىزدى.

كەشەگى كەزدەسۋ بوكسشىلاردىڭ وتكەن جىلى تەڭ تۇسكەن كەزدەسۋىنەن كەيىنگى ەكىنشى جەكپە-جەگى بولدى. وسى جولى تورەشىلەردىڭ شەشىمىنە سايكەس، مەكسيكالىق 114-114، 115-113، 115-113 ەسەبىمەن ايقاستىڭ جەڭىمپازى اتاندى. بۇل - GGG ءۇشىن كاسىپقوي بوكستاعى 38 جەڭىسى مەن ءبىر تەڭ دارەجەدە تۇسكەن ويىننان كەيىنگى العاشقى جەڭىلىسى.