الماتىلىقتار تىككەن قۇراق كورپە گيننەستىڭ رەكوردتار كىتابىنا ەندى
اتالمىش پورتال تاراتقان اقپاراتقا قاراعاندا، الماتىلىقتار كەشە قالا كۇنىن اتاپ ءوتتى.
«وسى جيىلعان جۇرت ءيىسى اڭقىعان اپورتتىڭ ءدامىن تاتىپ، ۇلتتىق-مادەني شارالاردىڭ كۋاسى بولدى. ناۋرىز مەرەكەسىندە باستالعان الىپ قۇراق كورپە دە بۇگىن تىگىلىپ ءبىتتى. ۇزىندىعى 11 شاقىرىمعا تاقايتىن قۇراق كورپە گيننەستىڭ رەكوردتار كىتابىنا تىركەلدى»، - دەپ جازادى پورتال.
«مۇنىڭ ءبارى وسى بەس ايدا تەز تىگىلە قالعان دۇنيە ەمەس. قانشا ادامنىڭ ەڭبەگى بولدى. ەڭبەگىنىڭ جەمىسى بۇگىن اقتالىپ جاتىر. سوندىقتان دا بۇكىل قالالىقتاردى ۇلكەن جەڭىسپەن قۇتتىقتاعىم كەلەدى. بۇل - قالانىڭ جەڭىسى»، - دەگەن پىكىرىن ءبىلدىردى قالالىق ورتالىقتاندىرىلعان كىتاپحانالار جۇيەسىنىڭ ديرەكتورى روزا قابيەۆا.
ءوز كەزەگىندە گيننەسس رەكوردتار كىتابى باس كەڭسەسىنىڭ وكىلى دجونا برەنت قازاقستاندىق قۇراق كورپەنى كورۋ ءۇشىن، باعاسىن بەرۋ ءۇشىن، قالا كۇنى مەرەكەسىنە ارنايى كەلىپ وتىرعاندىقتارىن جەتكىزدى.
«بۇل - شىنىمەن دە تاڭقالارلىق دۇنيە. سىزدەر راسىندا الەمدىك رەكوردتىڭ قايماعىن بۇزىپ وتىرسىزدار. وسىنى دالەلدەيتىن رەسمي قۇجاتتى دا تابىستادىق»، - دەدى ول.
قالا كۇنى مەرەكەسى ءبىر ايدان بەرى اتالىپ ءوتىپ جاتقانىن ايتا كەتكەن ءجون. وسى ۋاقىت ارالاعىندا 100 دەن استام مەرەكەلىك ءىس-شارا وتكەن. سونىڭ باسىم كوپشىلىگى مادەني شارالار. ولاردىڭ قاي-قايسىسى دا قالا تۇرعىندارىنىڭ كۇندەلىكتى ءومىرىن جارقىن ساتتەرگە تولتىرۋعا باعىتتالعان.
«بۇگىن وتە كەرەمەت مەرەكە بولىپ جاتىر. قازاقي سالت-ءداستۇرىمىز كورسەتىلۋدە. قازاقتىڭ سالت ءداستۇرى ماڭگى بولسىن. كوڭىل كۇيىمىز وتە كەرەمەت»، - دەگەن اسەرىمەن ءبولىستى قالا تۇرعىنى گۇلنۇر ءابدىراشيت.
قالا كۇنىنە ارنالعان كونسەرتتىك باعدارلامالار كەشكى ۋاقىتتا دا جالعاسىن تاپقان. حالىقارالىق «سۇڭقار» ترامپلين كەشەنىندە ەۋرازيالىق مۋزىكا بايقاۋى وتسە، «الاتاۋ» ءداستۇرلى ونەر تەتارىندا «الاتاۋىم - التىن ۇيام» رەسپۋبليكالىق اقىندار ايتىسى كوپشىلىكتىڭ ايىزىن قاندىردى.
