تۇركىستان وبلىسىندا «تاڭعاجايىپ تۇركىستان» بايقاۋى جاريالاندى
باسقوسۋدا باسقارما باسشىسى كوپشىلىكتى بايقاۋدىڭ ماقساتىمەن تانىستىرىپ، وعان ءبىر كىسىدەي قاتىسۋعا شاقىردى. بەيسەنباي تاجىبايەۆتىڭ سوزىنشە، ەلباسى ن. نازاربايەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنداعى «قازاقستاننىڭ كيەلى جەرلەرى گەوگرافياسى» باعدارلاماسىن جۇزەگە اسىرۋ مەن تۋعان جەردىڭ تۋريستىك الەۋەتىن كوتەرىپ، تاريحىن ناسيحاتتاۋ - باستى شارتتار. بايقاۋعا اعىمداعى جىلدىڭ 14- قىركۇيەگىنەن 12 - جەلتوقسانعا دەيىن جاريالانعان ماتەريالدار قابىلدانادى. جەڭىمپازدار ۇيىمداستىرۋشىلار تاراپىنان قۇرىلعان ارنايى كوميسسيانىڭ شەشىمىمەن انىقتالادى. ۇسىنىلعان ۇزدىك جۇمىستار «تۇركىستان جارشىسى» فەيسبۋك توبىندا ەڭ كوپ داۋىس جيناعانى، ەڭ كوپ ۇناتىلعانى (لايك) ، ەڭ كوپ بولىسىلگەنى (رەپوست) ارقىلى دا باعالانباق. جالپى جۇلدە قورى - 1350000 تەڭگە.
«تاڭعاجايىپ تۇركىستان» بايقاۋىندا باس جۇلدە، 1, 2 جانە 3-ورىندار بەرىلەدى. سونداي- اق ىنتالاندىرۋ سىيلىقتارى دا تاعايىندالعان.
«تۇركىستان وبلىسى قۇرىلىپ، شەجىرەلى شاھاردىڭ جاڭا ءداۋىرى باستالعانىن بىلەسىزدەر. ەندەشە، ءوڭىرىمىزدىڭ تىلسىم تاريحى مەن تاڭعاجايىپ تابيعاتىن ناسيحاتتاۋعا، تۇركىستاندى شىن مانىندەگى تۇركى الەمىنە ورتاق قالاعا اينالدىرۋعا ءبارىمىز اتسالىسۋىمىز كەرەك. بۇل رەتتە قوجا احمەت ياساۋي اتىنداعى حالىقارالىق قازاق- تۇرىك ۋنيۆەرسيتەتى ستۋدەنتتەرىنە دە مول مۇمكىندىك تۋىپ تۇر. وسى وقۋ ورنىندا جۋرناليستيكا ماماندىعى بويىنشا 100 گە جۋىق ستۋدەنت ءبىلىم الىپ جاتىر. ولاردىڭ اراسىندا اعىلشىن جانە تۇرىك تىلىندە تەرەڭ ءبىلىم الىپ جۇرگەندەرى دە بار ەكەن. دەمەك، تۇركىستان وبلىسى مەن تۇركىستان قالاسى تۋرالى بىرنەشە تىلدە ماقالا، ءتۇرلى ەڭبەكتەر جازىپ، شەتەلگە تانىتۋعا بولادى. كەز كەلگەن الەۋمەتتىك جەلى بەلسەندىلەرى قاتىسا الادى» ، - دەدى باسقارما باسشىسى.
جيىن بارىسىندا سونداي- اق ەرىكتى جۋرناليستەر كلۋبىن قۇرۋ جايى ءسوز بولدى. سول ارقىلى تۇركىستاننىڭ تاريحىن دارىپتەپ، تۋريستىك تارتىمدىلىعىن ارتتىرۋعا جاستار دا ءوز ۇلەسىن قوسا الادى.
ايتا كەتەيىك، قاتىسۋشىلار Facebook الەۋمەتتىك جەلىسىندە تۇركىستان وبلىسىنداعى «قازاقستاننىڭ كيەلى جەرلەر گەوگرافياسىنا» ەنگەن 24 نىسان تۋرالى پوست جاريالاۋى قاجەت. ءاربىر قاتىسۋشى كەم دەگەندە 20 جازبا جازۋى ءتيىس.
ۋنيۆەرسيتەت كىتاپحاناسىندا وتكەن كەلەلى باسقوسۋدا بۇدان بولەك وقۋ ورنىنىڭ «رۋحاني جاڭعىرۋ» باعدارلاماسى بويىنشا جەتەكشىسى امىرەقۇل ءابۋوۆ پەن الەۋمەتتىك عىلىمدار فاكۋلتەتىنىڭ دەكانى ەفتال باتماستىڭ، سونداي- اق «تۋريزم جانە جۋرناليستيكا» كافەدراسىنىڭ مەڭگەرۋشىسى بەكجىگىت سەردالى مەن وزگە دە ازاماتتاردىڭ وي- پىكىرلەرى تىڭدالدى. جۋرناليستيكا سالاسىنداعى ماسەلەلەر مەن ىزدەنىستەر جايى ايتىلدى. ستۋدەنتتەر دە وسى ماسەلەلەرگە وراي ءوز ۇسىنىستارىن جەتكىزىپ، تۇركىستاننىڭ جاڭا كەلبەتىن قالىپتاستىرۋ باستاماسىنا بەلسەنە قاتىساتىندىقتارىن جەتكىزدى.
