تەكەلىنىڭ اكىمى بۇزاقىلاردى ۇستاپ بەرگەندەرگە سمارتفون سىيعا تارتادى

تالدىقورعان. قازاقپارات - الماتى وبلىسىنداعى تەكەلى قالاسىنىڭ اكىمى باقتيار ونەربايەۆ قوعامدىق ورىنداردى قيراتىپ، لاستايتىنداردى ۇستاپ بەرگەندەرگە ەرەكشە تارتۋ جاساماق.

شاھار باسشىسى وسىنداي جايتقا كۋا بولىپ، ارنايى ۆيدەو نە بولماسا سۋرەتكە ءتۇسىرىپ العان جاندارعا Samsung ۇيالى تەلەفونىن سىيعا تارتپاق، دەپ حابارلايدى قازاقپارات ءتىلشىسى.

قازىر قالا اكىمىنىڭ جاڭا باستاماسى جايلى الەۋمەتتىك جەلىدە جاريالانىپ، كوپشىلىك جاڭالىقپەن ءبولىسىپ جاتىر. ال باقتيار التاي ۇلى مۇنداي باستامانى قولعا الۋعا تەكەلىدەگى سوڭعى جايتتار سەبەپ بولعانىن ايتادى.

«ءبىزدىڭ تەكەلىدە ۇلى وتان سوعىسى ارداگەرلەرىنە سالىنعان ەسكەرتكىش بار. تۇنگى ۋاقىتتا سول جەرگە كەلىپ ىشىمدىك ىشەدى، تەمەكى تۇقىلىن تولتىرىپ، دارەت تە سىندىرىپ كەتەدى. بۇل جاعداي كۇننەن-كۇنگە جيىلەپ بارادى. ەگەر وسىنداي ارەكەت جاساپ جۇرگەندەردى ءتۇسىرىپ السا، مەن ول ماتەريالداردى سوتقا جىبەرەمىن. اكىمشىلىك سوتتان شەشىم شىعارادى جانە سول مونۋمەنتتى سول ادامدارعا ءبىر اپتا جۋعىزامىن. ال تۇسىرگەن ادامعا سمارتفوندى حالىقتىڭ الدىندا قۇرمەتپەن تاپسىرامىز»، - دەدى باحتيار ونەربايەۆ قازاقپارات تىلشىسىنە.

ايتا كەتۋ كەرەك، تەكەلىنىڭ اكىمى - الەۋمەتتىك جەلىنى بەلسەندى قولدانۋشىلاردىڭ ءبىرى. ول وسىدان ءۇش كۇن بۇرىن عانا بەلگىسىز بىرەۋلەر كوشەدەگى جارىق شامدارىن سىندىرىپ كەتكەنىن جاريالاعان بولاتىن. ال ۆانداليزم، نە بولماسا قالانى لاستايتىندارعا كۋا بولعاندار بەينەجازبالارىن تەكەلى قالاسىنىڭ اكىمدىگىنە نەمەسە جەرگىلىكتى پوليتسياعا تاپسىرۋلارىنا بولادى.