بوكستان الەم چەمپيونى گاليب جافاروۆ جاڭا قىزمەتكە تاعايىندالدى
اقتوبەدە تاربيەلەنىپ، 2003-جىلى تايلاندتا وتكەن بوكستان الەم چەمپيوناتىنىڭ جەڭىمپازى بولعان گاليب جافاروۆ وسكەن ولكەسىنە قايتا ورالدى. ول ەندى اقتوبەدەگى بوكستان وليمپيادا رەزەرۆىن دايارلايتىن بالالار - جاس وسپىرىمدەر وبلىستىق مامانداندىرىلعان سپورت مەكتەبىنىڭ ديرەكتورى قىزمەتىن اتقارادى.
«اقتوبە وبلىسىنىڭ دەنە شىنىقتىرۋ جانە سپورت باسقارماسىنىڭ باسشىسى مەيرامبەك ماحامبەتوۆ جاڭا باسشىنى سپورت مەكتەپتىڭ ۇجىمىنا تانىستىرىپ، الداعى جۇمىسىنا ساتتىلىك تىلەدى. تاعايىنداۋ بارىسىندا گاليب جافاروۆ وزىنە ارتىلعان جاۋاپكەرشىلىكتى سەزىنەتىنىن جانە جۇكتەلگەن مىندەتتەردى ورىندايتىنىن ايتىپ، باسقارما باسشىسىنىڭ سەنىمدىلىگىنە ريزاشىلىعىن ءبىلدىردى. ول بوكستى دامىتۋعا ءوز ۇلەسىن قوسۋعا ۋادە بەردى»، - دەپ حابارلادى وبلىستىق سپورتتىڭ باسپا ءسوز قىزمەتى.
ايتا كەتەيىك، گاليب جافاروۆ بۇعان دەيىن باتىس قازاقستان وبلىسىنىڭ وليمپيادا رەزەرۆتەرىن دايارلاۋ ورتالىعىنىڭ ديرەكتورى قىزمەتىن اتقارعان-دى.
