گولوۆكينمەن بىرگە جاتتىعاتىن قازاقستاندىق بوكسشى مانسابىندا العاش رەت جەڭىلدى

 استانا. قازاقپارات -ءبىرىنشى ورتا سالماقتا جۇدىرىقتاساتىن قازاقستاندىق كاسىپقوي بوكسشى رۋسلان ماديەۆ مانسابىندا العاش رەت جەڭىلىستىڭ كەرمەك ءدامىن تاتتى.

وتانداسىمىز مەكسيكالىق بوكسشى پابلو سەزار كانوعا ەسە جىبەردى. 25 جاستاعى قازاقستاندىق بوكسشى Golden Boy پروموۋتەرلىك كومپانياسى ۇيىمداستىرعان بوكس كەشىنىڭ باستى جەكپە-جەگىندە جۇدىرىقتاستى.

Hard Rock قوناق ۇيىندە وتكەن كەزدەسۋدەن ESPN ارناسى كورسەتىلىم تاراتتى. بەسىنشى راۋندتا پابلو سەزار كانونىڭ قاباعى جارىلىپ، جەكپە-جەكتى جالعاستىرا المادى. ناتيجەسىندە 10 راۋندقا جوسپارلانعان شارشى الاڭداعى شايقاس بەل ورتاسىندا توقتاتىلدى.

5- راۋندتاعى ۇپايلار ناتيجەسى بويىنشا تورەشىلەر مەكسيكالىق بوكسشىنى جەڭىمپاز دەپ تانىدى. رۋسلان ماديەۆ وسىعان دەيىن وتكىزگەن 12 جەكپە-جەگىندە دە جەڭىسكە جەتكەن بوكسشى. ونىڭ 5 ۋىندە قارسىلاسىن نوكاۋتپەن ۇتقان. بۇل - ونىڭ كاسىپقوي بوكستاعى العاشقى جەڭىلىسى.

ول - GGG Promotions قۇرامىنداعى بوكسشىلاردىڭ ءبىرى. رۋسلاندى دا گەننادي گولوۆكيننىڭ باپكەرى ابەل سانچەس جاتتىقتىرادى.

Massaget.kz