نازاربايەۆ سانكسيالىق قاقتىعىستاردى ءتيىمدى پايدالانۋدىڭ جولىن كورسەتتى
«ءبىز اۋقىمدى جەكەشەلەندىرۋدى جۇزەگە اسىرىپ جاتىرمىز. تاۋ- كەن مەتاللۋرگيا، مۇناي- گاز، ەنەرگەتيكا، كولىك جانە باسقا سالالارداعى كاسىپورىنداردى ساتۋ كوزدەلگەن. «قازاق تەلەكوم»، «قاز اتوم ونەركاسىپ»، «ەير استانا»، «قازمۇنايگاز»، «قازپوشتا»، «قازاقستان تەمىر جولى» جانە باسقا دا ءىرى ۇلتتىق كومپانيالاردى ІРО- عا شىعاراتىن بولامىز»، - دەدى مەملەكەت باسشىسى.
ەلباسىنىڭ اتاپ وتۋىنشە، قازىرگى ۋاقىتتا قازاقستان تاراپى شەتەلدىك ينۆەستورلاردىڭ سۇرانىستارىن زەردەلەپ جاتىر. بۇل رەتتە تۇرىك كومپانيالارىنىڭ الەۋەتى، مۇمكىنشىلىكتەرى ەلىمىز ءۇشىن دە ماڭىزدى.
«قازىرگى ۋاقىتتا وزدەرىڭىز بىلەتىن دۇنيەجۇزىندە بولىپ جاتقان احۋالدا نەشە ءتۇرلى سانكسيالار، رەسەي مەن ا ق ش اراسىنداعى قارىم- قاتىناس، ەۋروپالىق وداق پەن رەسەيدىڭ اراسىنداعى قارىم- قاتىناس ناشارلاۋدا. قازىر كورىپ وتىرعان تۇركيانىڭ ەۋروپامەن، ا ق ش- پەن قارىم- قاتىناسىنىڭ اراسىندا كوپ شيەلەنىستەر، كەلەڭسىز جاعدايلار بار. ەكىنشى جاعىنان وسىنى پايدالانىپ، سىزدەردە جوق تاۋارلاردى قازاقستاننان اكەلۋگە، بىزدە جوقتى سىزدەردەن اكەلۋگە مۇمكىنشىلىك بار. ەكى ەل اراسىنداعى ۇكىمەتارالىق كوميسسيا، بيزنەس قاۋىمداستىعى جاقسىلاپ قارايتىن بولسا، ونداي تاۋارلاردىڭ ءتىزىمىن جاساۋعا، كوبەيتۋگە بولادى. ءبىر- بىرىمىزگە كومەكتەسىپ، ساۋدا- ساتتىقتى ارتتىرۋعا بولادى»، - دەدى نۇرسۇلتان نازاربايەۆ.
ايتا كەتەيىك، قازاقستان پرەزيدەنتىمەن كەزدەسۋگە تۇركيا ەكونوميكاسىنىڭ 15 پايىزىن قۇرايتىن 25 كومپانيانىڭ باسشىلارى قاتىستى. اتالعان كومپانيالار اۋىل شارۋاشىلىعى، تاماق ونەركاسىبى، گەولوگيا جانە تاۋ- كەن ءوندىرۋ ونەركاسىبى، حيميا ونەركاسىبى، ماشينا جاساۋ، جەڭىل ونەركاسىپ، دەنساۋلىق ساقتاۋ جانە فارماتسيەۆتيكا سالالارىندا جۇمىس ىستەيدى.
اۆتور: مارلان جيەمباي
