10:10, 14 - قىركۇيەك 2018 | GMT +5
الەمدەگى ەڭ تانىمال اۋە باعدارلارىنىڭ رەيتينگى جاريالاندى
استانا. قازاقپارات - Routes اۆياتسيالىق ونلاين قىزمەتى الەمدىك جولاۋشىلار لەگىن سارالاپ، ادامداردىڭ ەڭ كوپ جۇرەتىن اۋە باعدارلارىن اتادى، دەپ حابارلايدى قازاقپارات The Independent سايتىنا سىلتەمە جاساپ.
بەلگىلى بولعانداي، ساياحاتتاۋشىلاردىڭ اراسىندا ەڭ تارالعان باعدار سەۋلدان (وڭتۇستىك كورەيا) چەدجۋ ارالىنا ۇشاتىن رەيس ەكەنى انىقتالدى.
2017-جىلى بۇل باعداردا 13 ميلليون ادام جول جۇرگەن. ونلاين قىزمەتتىڭ مالىمەتتەرىنە سايكەس، اۋە كەمەلەرى كۇن سايىن وڭتۇستىك كورەيانىڭ استاناسىنان ارالعا 180 رەت ۇشقان.
ەكىنشى ورىنعا مەلبۋرن- سيدنەي باعدارى ورنالاستى. مۇندا 2017-جىلى 10 ميلليونعا جۋىق ساياحاتشى جول جۇرگەن. حالىقارالىق ۇشۋ باعىتتارىنىڭ اراسىندا ۇزدىكتەردىڭ قاتارىنا 6,7 ميلليون اۋە جولاۋشىلارى ۇشقان گونكونگ-تايبەي رەيسى دە كىردى.
