جاڭا ايفون سمارتفوندارى تانىستىرىلدى
ال كۇنى كەشە كومپانيانىڭ باس ديرەكتورى تيم كۋك كۋپەرتينودا iPhone X سەرياسىنىڭ جاڭا Xs, Xs Max جانە Xr فلاگماندارىن كورسەتتى. ونىڭ ايتۋىنشا، بۇل - Apple تاريحىنداعى ەڭ ىلگەرى سمارتفوندار.
جاڭا مودەلدەردىڭ ۇزدىك بولماۋعا ەش قاقى جوق ەدى، البەتتە. iPhone Xs ديزاينى وتكەن جىلعى مودەلدەن ايىرماشىلىعى جوق. اينەك پەن قۇرىشتان جاسالعان سول كورپۋس، سول ديزاين.
تەك Xs Max قانا ءوزىنىڭ 6.5 ديۋيم ەكرانىمەن ەرەكشەلەنگەن. اق، سۇر تۇستەرگە جاڭا التىن ءتۇستى قوسقان ەكەن. iPhone Xs Max كولەمى iPhone 8 Plus سياقتى، ءبىراق جاڭا سمارتفوننىڭ ەكرانى 1 ديۋيمگە ارتىق. ديسپلەي انىقتىعى: iPhone Xs - 1125 x 2436px, iPhone Xs Max - 1242 x 2688px. Apple ءوز ءداستۇرىن ساقتاپ، وتكەن جىلعى سمارتفوندى جەتىلدىرە تۇسكەن.
مىسالى سمارتفوندارعا Apple A12 Bionic پروتسەسسورى ورناتىلعان. ونىڭ قابىلەتى سمارتفوندى بۇرىنعىدان 50 پايىزعا جىلدامىراق جۇمىس ىستەۋىنە مۇمكىندىك بەرەدى. مىسالى سەكۋندىنا نەگىزگى جانە قوسالقىلاردى ەسەپتەگەندە 5 تريلليون وپەراتسيا جاسالادى. سوڭعى پرەزەنتاتسيادان بايقاعانىمىز - Apple Touch ID ساۋساق ءىزى سكانەرىنەن ءبىرجولا باس تارتقانعا ۇقسايدى.
ەندى سمارتفوندار تەك بەت الپەتتى تانيتىن Face ID سكانەرى قولدانىلماق. سمارتفونداردىڭ ەكران جايماسى 120 گەرتس جيىلىككە يە. دەمەك سۋرەت پەن انيماتسيا ودان ءارى قانىعىراق كورسەتىلەدى.
المالى سمارتفوندار ەندى سىيىمدى بولا ءتۇستى. ەكى سمارتفوننىڭ جەدەل جادى - 4 GB، ال ىشكى جادى - 512 GB. 64, 256 GB نۇسقالارى دا بار. جاڭا فلاگماندار ەندى جاڭاشا دىبىستالادى.
سمارتفونداردىڭ وڭ جانە سول جاعىنا ستەرەو ديناميكتەر ورناتىلعان ەكەن. سول ارقىلى دىبىس بارىنشا انىق، اۋەزدى شىعادى. ودان قالدى دىبىس جازۋ ءۇشىن ءتورت ءتۇرلى ميكروفون پايدالانىلادى. كامەرا مەگاپيكسەلدەرى 12x12 MP (فرونتال كامەرا - 7 MP) تۇرادى.
40 مەگاپيكسەلدى كامەرافون Huawei P20 Pro-دان كەيىن مۇنداي كورسەتكىش ەش تاڭعالدىرماسى انىق.
فلاگماندارمەن بىرگە بيۋجەتتىك iPhone Xr مودەلى دە ۇسىنىلدى. بۇل مودەلدى iPhone X پەن iPhone 8 مودەلدەرىنىڭ قوسىندىسى دەۋگە بولاتىن شىعار. ءبىراق باستى ارتىقشىلىعى - ەندى ءبىر جارىم ساعاتقا ۇزاعىراق جۇمىس ىستەيدى.
جاڭا iPhone سمارتفوندارى قازاقستاندا 28- قىركۇيەكتەن باستاپ ساتىلادى. ەلىمىزدەگى رەسمي باعا ءالى بەلگىسىز، ءبىراق كومپانيا بەكىتكەن باعالار مىناداي: iPhone Xr - $749 (280000 تەڭگە)، iPhone Xs - $999 (374000 تەڭگە)، iPhone Xs Max - $1099 (412125 تەڭگە).
Massaget.kz
