اقمولا وبلىسىندا استىقتىڭ تورتتەن ءبىر بولىگى جينالدى

كوكشەتاۋ. قازاقپارات - اقمولا وبلىسىندا ءدان جانە ءداندى داقىلداردىڭ تورتتەن ءبىر بولىگى جينالدى، دەپ حابارلايدى قازاقپارات ءتىلشىسى وڭىرلىك كوممۋنيكاتسيالار قىزمەتىنە سىلتەمە جاساپ.

اقمولا وبلىستىق اۋىل شارۋاشىلىعى باسقارماسىنىڭ مالىمەتى بويىنشا، بۇگىنگى كۇنگە دەيىن 1 ميلليون 132,7 مىڭ گەكتار جەردىڭ ەگىنى نەمەسە بارلىق ەگىس القابىنىڭ 26, 2 پايىزى ورىلىپ، 1 ميلليون 110 مىڭ توننا استىق جينالدى. ءداندى داقىلداردىڭ ءار گەكتارىنان وبلىس بويىنشا ورتاشا ءونىم 9,6 سەنتنەردەن اينالۋدا.

«مايلى داقىلدار 11,1 مىڭ گەكتار اۋماقتا، كارتوپ - 3,5 مىڭ گەكتار جانە كوكونىس 1,3 مىڭ گەكتار جەردە جينالدى»، - دەپ اتاپ ءوتتى ۆەدومستۆودان.

مامانداردىڭ سوزىنشە، قولدا بار اۋىلشارۋاشىلىق تەحنيكالارى مەن ەگىستىك القاپتارىنىڭ اۋماعىن ەسەپكە الىپ جانە اۋا رايىنىڭ قولايلى ساتتەرىن ۇتىمدى پايدالانۋ ارقىلى تاۋلىگىنە 160 مىڭ گەكتار القاپتا ەگىن جيناۋعا بولادى.

 «جينالعان استىق وڭىردەگى جالپى سىيىمدىلىعى 4,4 ميلليون توننانى قۇرايتىن 67 استىق قابىلداۋ كاسىپورىندارىنا تاسىمالدانۋدا. وعان قوسا، اۋىل شارۋاشىلىعى قۇرىلىمدارىنىڭ ەنشىسىندەگى جالپى سىيىمدىلىعى 2 ميلليون توننا بولاتىن استىق ساقتاۋ ورىندارى بار»، - دەپ تولىقتىردى ۆەدومستۆودان.

اۆتور: اسلان وسپانوۆ