قازاقستان تۇركيامەن ەكونوميكالىق قاتىناستاردى دامىتۋعا مۇددەلى - نازاربايەۆ
«تۇركيا مەن قازاقستان اراسىنداعى قارىم- قاتىناس دوستىق، باۋىرلاستىق جانە ءوزارا سەنىمگە نەگىزدەلگەنىن بىلەسىزدەر. قازاقستان تاۋەلسىزدىگىنىڭ ءبىرىنشى كۇنىنەن باستاپ تۇركيامەن قارىم- قاتىناستا ەڭ جاقىن مەملەكەت بولىپ كەلە جاتىرمىز. تۇركيا ەلىنىڭ قازاقستاندى وسى جىلدارى قولداپ كەلە جاتقانىن ۇمىتپايمىز. تۇركيا قازاقستان ساۋدا اينالىمىنىڭ العاشقى وندىعىنا كىرەتىن ستراتەگيالىق ارىپتەس بولىپ تابىلادى. ەلدەرىمىز اراسىنداعى تاۋار اينالىمى 2017 -جىلى 27 پايىزعا ارتىپ، 2 ميلليارد دوللارعا جۋىقتادى. بيىلعى جىلدىڭ ءبىرىنشى جارتىجىلدىعىندا 820 ميلليون دوللار بولدى»، - دەپ اتاپ ءوتتى مەملەكەت باسشىسى.
نۇرسۇلتان نازاربايەۆ تاۋەلسىزدىك العاننان بەرى تۇركيا قازاقستانعا 3 ميلليارد دوللاردان استام تىكەلەي ينۆەستيتسيا سالعانىن، ال قازاقستان تۇركياعا 940 ميلليون دوللار قۇيعانىن اتاپ ءوتتى. قازاقستاندا ءتۇرلى سالالاردا تۇرىك كاپيتالىنىڭ قاتىسۋىمەن 2 مىڭعا جۋىق كاسىپورىن جۇمىس ىستەيتىندىگىن ايتتى.
«ولار حيميا جانە جەڭىل ونەركاسىپ، ماشينا جاساۋ، قۇرىلىس ماتەريالدارىن ءوندىرۋ، تاۋ- كەن مەتاللۋرگيا جانە باسقا سالالاردى قامتيدى. ءبىزدىڭ ءىرى سەرىكتەستەرىمىزدىڭ اراسىندا Anadolu, Yildirim, Urker، Abdi Ibrahim جانە باسقالارى بار. سونداي- اق قازاقستاندا 1990 جىلدان بەرى تۇركيالىق «Ziraat» بانكى قىزمەت كورسەتەدى. 2012 -جىلدان بەرى ەكى ەلدىڭ كاسىپكەرلەرىن جان- جاقتى ىنتالاندىرۋعا جانە قولداۋعا باعىتتالعان «جاڭا سينەرگيا» باعدارلاماسى جۇزەگە اسىرىلىپ كەلەدى. بۇل باعدارلامانى تۇركيا پرەزيدەنتى رەجەپ تاييپ ەردوعاننىڭ قازاقستانعا ساپارىندا، كەلىسسوزدەر كەزىندە ىسكە قوسقان بولاتىنبىز. ونىڭ اياسىندا سوماسى 800 ميلليون دوللار بولاتىن 23 جوبا ىسكە قوسىلدى. 3 مىڭ جۇمىس ورنى قۇرىلدى»، - دەدى ەلباسى.
قازاقستان پرەزيدەنتى كەشە انكارادا ەكى ەلدىڭ بيزنەس وكىلدەرىنىڭ اراسىندا سوماسى 1,7 ميلليارد دوللاردان اساتىن 24 قۇجاتقا قول قويىلعانىن اتاپ ءوتتى.
«بۇل ءوزارا سەنىمدىلىك پەن ىنتىماقتاستىقتىڭ جارقىن ۇلگىسى. ەكونوميكالىق قاتىناستاردى ودان ارى دامىتۋعا قازاقستان جاعى ءار ۋاقىتتا مۇددەلى. وزدەرىڭىز بىلەسىزدەر، قازاقستان ەۋرازيالىق ەكونوميكالىق وداقتىڭ مۇشەسى. بۇل وداقتىڭ اياسىندا 180 ميلليوننان استام حالىق بار. ءبىزدىڭ ستراتەگيالىق ماقساتىمىز - الەمنىڭ وزىق 30 ەلىنىڭ قاتارىنا كىرۋ. وسى باعىتتا جۇمىس ىستەپ جاتىرمىز. قازاقستان ءتيىمدى بيزنەس جۇرگىزۋ ءۇشىن جاڭا مۇمىندىكتەر مەن ۇلكەن الەۋەتكە يە مەملەكەت»، - دەدى نۇرسۇلتان نازاربايەۆ.
ايتا كەتەيىك، قازاقستان پرەزيدەنتىمەن كەزدەسۋگە تۇركيا ەكونوميكاسىنىڭ 15 پايىزىن قۇرايتىن 25 كومپانيانىڭ باسشىلارى قاتىستى. اتالعان كومپانيالار اۋىل شارۋاشىلىعى، تاماق ونەركاسىبى، گەولوگيا جانە تاۋ- كەن ءوندىرۋ ونەركاسىبى، حيميا ونەركاسىبى، ماشينا جاساۋ، جەڭىل ونەركاسىپ، دەنساۋلىق ساقتاۋ جانە فارماتسيەۆتيكا سالالارىندا جۇمىس ىستەيدى.
اۆتور: مارلان جيەمباي
