قازاق- جاپون بىرلەسكەن «بارىمتاشىلار» فيلمىنىڭ ءتۇسىرىلىمى قالاي ءجۇرىپ جاتىر

استانا. قازاقپارات - قازاقستاندىق- جاپونيالىق بىرلەسكەن «بارىمتاشىلار» فيلمىنىڭ ءتۇسىرىلىمى قازىرگى ۋاقىتتا الماتى وبلىسىنداعى تۇزكول اۋماعىندا جۇرگىزىلۋدە،

 دەپ حابارلايدى قازاقپارات ءتىلشىسى «قازاقفيلم» كينوستۋدياسىنىڭ باسپا ءسوز قىزمەتىنە سىلتەمە جاساپ.

بۇقارالىق اقپارات وكىلدەرى جاقىندا قازاقستان مەن جاپونيا بىرلەسىپ ءتۇسىرىپ جاتقان «بارىمتاشىلار» (شارتتى اتاۋى) تولىقمەتراجدى فيلمىنىڭ ءتۇسىرىلىم الاڭىنا - الماتى وبلىسى تۇزكولگە بارىپ قايتقان. قازاقستان تاراپىنان جوبانى ق ر مادەنيەت جانە سپورت مينيسترلىگىنىڭ تاپسىرىسى بويىنشا ش. ايمانوۆ اتىنداعى «قازاقفيلم» اق، جاپونيا تاراپىنان - «Tokyo New Cinema» كومپانياسى ىسكە اسىرۋدا.

فيلمنىڭ پروديۋسەرلەرىنىڭ ءبىرى - سيەدزو يچياما (جاپونيا). ول تاكەشا كيتانو، سزيا دجانگكە، حوۋ سياوسيانيا سىندى تانىمال رەجيسسەرلەر تۇسىرگەن فيلمدەردىڭ پروديۋسەرى. جالپى العاندا، سەدزو 20-دان استام فيلمگە پروديۋسەر بولعان. ولاردىڭ كوپشىلىگى ءىرى بايقاۋلارعا قاتىسىپ، بەرلين، كانن جانە ۆەنەتسيا كينوفەستيۆالدەرىندە جۇلدەلەر يەمدەنگەن.

«بارىمتاشىلار» فيلمى تيان- شان تاۋىنىڭ بوكتەرىندەگى شاعىن اۋىلدا تۇراتىن تاتۋ وتباسى تۋرالى باياندايدى. ولار شۋلى قالادان جانە تۇراقسىزدىقتان الىستا، جىلقى باعۋمەن اينالىسادى. ءبىر كۇنى جىلقى ۇرلايتىن توپ الىسقا وتاعاسىن الداپ اپارىپ، اياۋسىز ولتىرەدى دە تابىن جىلقىنى ايداپ اكەتەدى. 12 جاسار ولجاس توپتىڭ قولىنان مەرت بولعان اكەسىنىڭ ولىمىنە قايعىرىپ، زۇلىمدىقپەن كۇرەسىپ، وتباسىلارىنا تۇسكەن اۋىرتپالىقتى قارىنداستارىمەن بىرگە كەشەدى. قورعانسىز قالعان ولجاستىڭ وتباسىنا عايىپتان پايدا بولعان بوگدە بىرەۋ قول ۇشىن سوزادى»، - دەلىنگەن حابارلامادا.

فيلم بويىنشا رەجيسسەر ەرلان نۇرمۇحامبەتوۆ (قازاقستان)، تەڭ رەجيسسەرى ليزا تاكەبا (جاپونيا)، قويۋشى وپەراتور ءازيز جامباكيەۆ (قازاقستان)، اكتريسا سامال ەسلياموۆا (قازاقستان) جانە اكتەر ميراي مورياما (جاپونيا) جۇمىس ىستەيدى.

رەجيسسەر ەرلان نۇرمۇحامبەتوۆ فيلمنىڭ جانرىن ۆەستەرن مەن مەلورداما ارالاس بولادى دەپ سيپاتتاي وتىرىپ، وتاندىق جانە جاپوندىق كورەرمەندەرگە باعىتتالعانىن اتاپ ءوتتى.

«جاپون تاراپى بەلگىلى اۋديتوريا مەن تابىس اكەلەتىنەن ءۇمىتتى. سول سەبەپتەن دە فيلمگە جاپوننىڭ تانىمال اكتەرى ميراي مورياما شاقىرىلعان»، - دەدى نۇرمۇحامبەتوۆ.

اكتەر ميراي مورياما «بارىمتاشىلار» فيلمىندە عايىپتان پايدا بولاتىن قايرات ەسىمدى كەيىپكەردى سومدايتىنىن جانە قازاق ءتىلىن مەڭگەرىپ، اتقا سالت ءمىنىپ ءجۇرۋدى ۇيرەنگەنىن ايتتى.

«مەنى بۇل جوبادا قاتتى قىزىقتىرعانى - اكە مەن بالا وقيعاسى. سونىمەن قاتار، جوبانىڭ قازاقستاندىق جانە تۇسىرىلىمدەر سىزدەردىڭ ەلدەرىڭىزدە جۇرەتىنى مەنى باۋراپ الدى» - دەپ قوستى ميراي مورياما.

فيلمنىڭ پروديۋسەرى يۋليا كيمنىڭ ايتۋى بويىنشا، تۇسىرىلىمدەر شونجى مەن شەلەكتە ءوتىپ، ءبىر اي بويى جۇرەدى. فيلمنىڭ رەليزى 2019 -جىلعا جوسپارلانعان.

اۆتور: ايان بەكەن ۇلى