جاڭا ءان. ارمانىم جوق استىندا ولسەم كوك تۋدىڭ
دەلەبەنى قوزدىرىپ، كوزگە جاس ۇيالاتاتىن ءاننىڭ ءسوزىنىڭ اۆتورى، ايتىسكەر اقىن ازامات مالجەنباي بىلاي دەپ سىر اقتارادى: «تاۋەلسىز ەلدىڭ كوك تۋى دەگەن - ازاتتىقتى اڭساپ، زارىعىپ جەتكەن قازاققا كوزىنىڭ نۇرى، كوڭىلىنىڭ سىرى، نامىسىنىڭ جالاۋى عوي. ال ءبىز سياقتى اتامەكەندى اڭساپ، قاڭسىرىعى كەۋىپ جەتكەن قازاققا كوك تۋى جەلبىرەگەن قازاقستاننىڭ، ۇلى وتاننىڭ بەرەتىن رۋحى تىپتەن بولەك. ءار قازاق ەلىمىزگە وزىندىك ۇلەسىن قوسىپ جاتىر عوي، مەندە ءار كۇنى سولاردىڭ قاتارىندا، شىركىن- اي مەن دە ءوز ەلىمە، ءوز وتانىما ايتارلىقتاي ۇلەس قوسسام عوي دەگەن ارمانمەن جۇرەمىن، ءبىراق ءالى اۋىز تولتىرىپ ايتارلىقتاي ەشتەمە تىندىرا الماي كەلەمىن. تەك قازىرشە سول بويدى كەرنەگەن الاپات سەزىم مەن وتانعا دەگەن ىستىق ماحابباتىمدى، ۇزىلمەس سۇيىسپەنشىلىگىم مەن ۇكىلى ءۇمىتىمدى اۋىق- اۋىق جىر جولدارىمەن جەتكىزىپ، كەيدە ايتىستاردا ايتىپ ءجۇرمىن. وسى جىرىم دا سول وردالى وتانىما، قاسيەتتى قازاعىما، كيەلى كوك تۋىما دەگەن ءمولدىر كوڭىلىمنىڭ، پاك جۇرەگىمنىڭ، جان قالاۋىمنىڭ سىعىندىسى.
نەگىزى بۇل ءبىر جىل بۇرىن جازىلعان جىر بولاتىن، وتكەندە ءبىر «ولەڭ جانە الەم» دەگەن بايقاۋعا قاتىساتىن بولىپ، وسى جىرىمدى ءوز داۋىسىممەن بەينەجازبا تۇرىندە وقىعان بولاتىنمىن. كەيىننەن ول WhatsApp جەلىسىندە كەڭىنەن تاراپ كەتتى. سول ولەڭىمدى قازىرگى قازاقتىڭ ۇلتجاندى جۋرناليستەرىنىڭ ءبىرى، ەكى ەل اراسىنداعى ايتىستىڭ التىن كوپىرى بولىپ جۇرگەن ەرلان تولەۋباي دەگەن ونەرلى ازامات كورە سالىپ، جىردى ءبىر ەستىگەننەن كوڭىلى تولقىپ، كوزى بۋلانىپتى. سودان دەرەۋ مەنىڭ فەيسبۋكتاعى جەكە پاراقشاما شىعىپ، تەلەفون ءنومىرىمدى سۇراپتى. مەن كورىپ جازىپ جىبەردىم، ەكەۋمىز سويلەستىك، ۆاتساپ ارقىلى جىردىڭ تولىق تەكستىن جىبەردىم. سودان قىزىق بولعاندا ەرەكەڭ ارادا بەس مينۋت سالىپ، «ازاكە، مىناعان مىناداي ءان كەلدى» دەپ، كەرەمەت ءبىر سىر مەن ساعىنىشقا تولى، جىگەر مەن ماحابباتقا تولى ءبىر اۋەندى قالىقتاتىپ تۇر. اۋەنى ءبىر ەستىگەننەن قاتتى ۇنادى، ءسويتىپ ەلىمە دەگەن جۇرەك جاردى جىرىم ەرلان تولەۋبايدىڭ جۇرەك قىلىن ءدال تەربەپ، اۋەلەگەن انگە اينالىپ شىعا كەلدى. ەندى ونى التىن داۋىستى ءانشى يبراگيم ەسكەندىر باۋىرىمنىڭ ورىنداۋى ءتىپتى قۋانىشىمدى ەسەلەپ، مەرەيىمدى تاسىتتى. ەندى نە دەيمىن، قازاقتىڭ دارىندى ۇلدارىمەن بىرگە التى الاشىما، رۋحتى ۇلتىما ارنالعان وسىنداي ءان سىيلاعانىمىزعا قۋانىشتىمىن! كيەلى كوك تۋدىڭ جولىندا جانىن قۇربان ەتەتىن قازاعىم، اق جۇرەكتەرىڭىزبەن "جانىم قازاقتى" قابىل الىڭىزدار!» .
«جانىم قازاقتى» العاشقىلاردىڭ ءبىرى بولىپ تىڭداپ ۇلگەرگەن جۋرناليست سانسىزباي نۇربابا:
«تاۋەلسىزدىك الدىق، دەربەس ەل بولدىق. قازاقتىڭ كوك تۋى كوكتە جەلبىرەگەندە بۇگىنگىنىڭ اقىندارى دا شابىت قىسقاننان ءبىر ىسىپ، ءبىر سۋىدى. تۋداعى قىران قۇساپ، قۇلاشىن كەردى. تالاي ولەڭ تۋدى. تۋىپ تا جاتقان شىعار. ءبىراق سونىڭ انگە اينالعانى، جاڭىلماسام، - جۇرت تەگىس بىلەتىن «كوك تۋدىڭ جەلبىرەگەنى» عانا. جاقسى ءاننىڭ سيرەك تۋاتىنى و باستان بەلگىلى عوي. دەگەنمەن ءدال وسى تاقىرىپتا تاعى ءبىر تاماشا ءان پايدا بولدى دەسەم، سەنەر مە، ەدىڭىز؟ ! قىزىعى، تۋعا قاتىستى ءسوز ءبىر- اق جەرىندە، قايىرماسىندا عانا:
شاڭىراعىڭا ءبىر ۋىق بوپ قادالىپ،
ارمانىم جوق، استىندا ولسەم كوك تۋدىڭ. - دەيدى. عاجاپ ءسوز. تاۋەلسىزدىككە ارنالعانىمەن، وسى ءان ماعان كوك تۋدىڭ قاسيەتىن ۇقتىرۋعا جارالعانداي بولادى دا تۇرادى. ونىڭ ۇستىنە، ورىنداۋشىسى - كوك تۋدى جەلبىرەتىپ ءجۇرىپ، كوپتىڭ كوڭىلىنەن شىققان يبراگيم ەسكەندىر ەكەن. ءان اۆتورى ەرلان تولەۋباي مەن ءسوزىن جازعان ازامات ءمالجانباي - ارعى بەتتەن كەلگەن جىگىتتەر. سودان دا شىعار، ءاننىڭ اۋەزىندە ساعىنعان جۇرەكتىڭ لۇپىلىندەي، الىپ- ۇشقان جاننىڭ اڭسارىنداي الدەنە بار. الدە ءاندى ەرەكشەلەپ تۇرعان وزگەشەلىگى وسىندا ما؟ ماعان سولاي سەزىلدى، ەندى ءسىز تىڭداپ كورىڭىز!» دەپ وي قوزعايدى.
بۇگىندە الەۋمەتتىك جەلىدە بولسىن، ونەر كەنىشى ەل ىشىندە بولسىن، قازاق ەسترادا جۇلدىزدارىنىڭ اراسىندا ىستىق ىقىلاسقا بولەنە باستاعان «جانىم قازاق» كوپ قازاققا وي سالارى انىق. ەندەشە اقىن، كومپوزيتور، اۋزىن اشسا، قازاق دەپ سوققان جۇرەگى كورىنەتىن ەرلان تولەۋبايدى ءساتتى شىققان انىمەن قۇتتىقتاي وتىرىپ، تىڭدارمان قاۋىم ءسىز دە ءوز باعاڭىزدى بەرىڭىز دەگىمىز كەلەدى.
«قامشى»
