ناتو قازان- قاراشا ايلارىندا ەڭ ءىرى اسكەري جاتتىعۋىن وتكىزەدى
بۇل تۋرالى اليانستىڭ رەسمي وكىلى وانا لۋنگەسكۋ Twitter- دە مالىمدەدى. ول جاتتىعۋعا دايىندىق قىزۋ جۇرگىزىلىپ جاتقانىن ايتتى.
گەرمانيالىق DPA اگەنتتىگىنىڭ مالىمەتىنشە، جاتتىعۋ ناتو- نىڭ قاۋىپ- قاتەردىڭ جاڭا تۇرىنە، ونىڭ ىشىندە «ۇگىت- ناسيحات پەن گيبريد سوعىسىنىڭ جاڭا ادىستەرىنە» جاۋاپ بەرۋگە قانشالىقتى دايىن ەكەندىگىن تەكسەرۋ ءۇشىن وتكىزىلمەك. باتىس ەلدەرى بۇعان دەيىن ماسكەۋدى «گيبريد سوعىسىن» جۇرگىزىپ وتىر دەپ ايىپتاعان. ناتو قۇجاتتارىندا وداقتاستاردىڭ ءىرى كولەمدە وپەراتسيالار جۇرگىزۋ جانە بەلگىلى ءبىر اۋماققا اسكەر ءتۇسىرۋ مەن اسكەري تەحنيكانى تاسىمالداۋ دايىندىعىن پىسىقتايتىنى ايتىلعان.
جاتتىعۋ ەكى كەزەڭدە - 25 - قازان مەن 7 - قاراشا ارالىعىندا جانە 14-23 - قاراشا كۇندەرى وتكىزىلەدى. وعان ناتو- عا مۇشە جانە سەرىكتەس 30-دان استام مەملەكەتتەن 40 مىڭ اسكەري قىزمەتكەر، 130 ۇشاق، 70 كەمە جانە 10 مىڭنان استام اسكەري تەحنيكا قاتىسادى. ناتو كۇشتەرى شارادا جاۋدىڭ نورۆەگيا جاعالاۋىنان باسىپ كىرۋىنە تويتارىس بەرۋگە جاتتىعادى. جاتتىعۋ اتلانت مۇحيتى مەن بالتىق تەڭىزىنىڭ سولتۇستىك اۋداندارى، ونىڭ ىشىندە يسلانديادا، فينليانديا مەن شۆەتسيانىڭ اۋە كەڭىستىگىندە دە بولادى.
رەسەي 2014 -جىلى قىرىم تۇبەگىن اننەكسيالاپ الىپ، ۋكراينا شىعىسىنداعى قاقتىعىسقا كيلىككەن سوڭ ناتو اسكەري جاتتىعۋ اۋقىمىن ۇلعايتقان. اليانس سوڭعى رەت Trident Juncture جاتتىعۋىن 2015 -جىلى وتكىزگەن. ول كەزدە جاتتىعۋعا 36 مىڭ اسكەري قىزمەتكەر، ونىڭ ىشىندە ۋكراينا اسكەريلەرى دە قاتىسقان.
11 - قىركۇيەكتە رەسەيدىڭ قيىر شىعىسىندا وسى ەل تاريحىنداعى ەڭ ءىرى «ۆوستوك-2018» اسكەري جاتتىعۋى باستالدى. رەسەي قورعانىس مينيسترلىگىنىڭ حابارلاۋىنشا، جاتتىعۋعا 300 مىڭعا تاياۋ اسكەري قىزمەتكەر، 80 كەمە، 36 مىڭ بروندى تەحنيكا مەن مىڭنان استام ۇشاق قاتىسادى. جاتتىعۋ 17- قىركۇيەككە دەيىن وتەدى.
www.azattyq.org
