اكىم قابىلداعان جەتىم باسپانا الاتىن بولدى - اقمولا وبلىسى
بۇل جولى قوعامدىق قابىلداۋدا بولعان تۇرعىندار اۋىل مەكتەپتەرى مەن جولدارعا كۇردەلى جوندەۋ جۇمىستارىن جۇرگىزۋ، ماتەريالدىق جانە قۇقىقتىق كومەك كورسەتۋ توڭىرەگىندە تۋىنداعان ماسەلەلەردى كوتەردى.
كوكشەتاۋ قالاسىنىڭ تۇرعىنى اناتولي رومارەنكو ستەپنياك قالاسىنداعى جىلجىمايتىن مۇلىك قۇقىعىن قالپىنا كەلتىرۋ جونىندە كومەك سۇرادى. تۋعانىنان اناسىنان ايىرىلعان ول 8 جاسقا دەيىن اجەسىمەن ستەپنياك قالاسىندا تۇرعان ەكەن. كەيىن اجەسى ومىردەن وزعان سوڭ اتالمىش پاتەر وعان مۇراعا قالدىرىلعان. تۇل جەتىمگە اينالعان ول سولتۇستىك قازاقستان وبلىسىنىڭ ع. مۇسىرەپوۆ اۋدانىنداعى شوپتىكول بالالار ۇيىنە تاربيەلەنۋگە جىبەرىلەدى. سول كەزدە ونىڭ اجەسىنەن مۇرا بولىپ قالعان پاتەرى ءسۇرىلىپ كەتىپتى. ءبىرجان سال اۋدانى اكىمىنىڭ ورىنباسارى ەرسايىن سابىروۆتىڭ ايتۋىنشا، بۇل ماسەلە اۋدان اكىمدىگىندە باقىلاۋعا الىنعان.
«اۋدان ورتالىعىندا 4 قاباتتى تۇرعىن ءۇي قالپىنا كەلتىرىلۋدە. جاقىندا اناتوليگە وسى ۇيدەن پاتەر بەرىلىپ، تۇراقتى جۇمىسقا ورنالاستىرىلاتىن بولادى»، - دەپ ءتۇسىندىردى ەرسايىن سابىروۆ.
زەرەندى ەلدى مەكەنىنىڭ تۇرعىنى زاۋرە مەڭدىبايەۆا مۇگەدەك بالاسىن ەمدەتۋ ءۇشىن ماتەريالدىق كومەك سۇرادى. وبلىس اكىمى مۇڭ- مۇقتاجىن ايتىپ كەلگەن اناعا زاڭ اياسىندا كومەكتەسۋ تۋرالى وبلىس دەنساۋلىق ساقتاۋ باسقارماسى مەن زەرەندى اۋدانى اكىمدىگىنىڭ باسشىلىعىنا تاپسىرما بەردى.
ال، رايحان تاجىبايەۆا ەسىمدى تۇرعىن ەلەنوۆكا اۋىلداعى ورتا مەكتەپكە كۇردەلى جوندەۋ جۇمىستارىن جۇرگىزۋگە كومەك سۇرادى. ونىڭ ايتۋىنشا، ىرگەسى وسىدان جارتى عاسىر بۇرىن قالانعان ءبىلىم ورداسى كۇردەلى جوندەۋ جۇمىستارىن قاجەت ەتەدى. ءدال وسىنداي ماسەلەنى سكايپ ارقىلى شورتاندى اۋدانىنىڭ بوزايعىر اۋىلىنىڭ تۇرعىنى دا كوتەردى. قوعامدىق قابىلداۋدا «جولىمبەت- بەكتاۋ» تاس جولىنا كۇردەلى جوندەۋ جۇمىستارىن جۇرگىزۋ ماسەلەسى دە ايتىلدى.
ايماق باسشىسى قابىلداۋعا كەلگەن تۇرعىنداردىڭ ءاربىرىنىڭ ساۋالىن تىڭداي كەلە، بارلىق وتىنىشتەردى باقىلاۋعا الىپ، جاۋاپتى تۇلعالارعا تيىستى تاپسىرمالار بەرەتىنىن جەتكىزدى.
