جەرورتا تەڭىزىندە جوعالعاندار

 استانا. قازاقپارات  - تاياۋ شىعىستاعى سوعىستان قاشىپ، ەۋروپا اۋعانداردىڭ قاتارى ءالى دە ازايماي وتىر. ارينە، بىلتىرعىعا قاراعاندا ميگرانتتاردىڭ سانى از دا بولسا كەمىدى. ءبىراق جايلى جەر ىزدەپ، ەۋروپا قۇرلىعىنا اتتانعانداردى ول جاقتا جۇماق كۇتىپ تۇرعان جوق.

 قارت قۇرلىققا جەتكەنشە، ولار نەشە ءتۇرلى اۋىر جاعدايعا تاپ بولادى. ەڭ ءبىر قيىنى، جەرورتا تەڭىزى ارقىلى اتتانعانداردىڭ بارلىعى دا ەۋروپاعا جەتە المايدى. ويتكەنى، تەڭىز ارقىلى وتەتىندەرگە وڭاي تيمەيدى. قايىعى نەمەسە كەمەسى اساۋ تولقىندارعا شىداس بەرمەي، اۋدارىلىپ قالادى. بۇل تۋرالى ب ۇ ۇ- نىڭ بوسقىندار جونىندەگى اگەنتتىگىنىڭ ارنايى بايانداماسىندا دا ناقتى ايتىلدى. ارينە، بۇرىنعىعا قاراعاندا قارت قۇرلىققا اتتانعان كەلىمسەكتەردىڭ سانى ازايدى.

 اگەنتتىك ماماندارى سوڭعى التى ايدا ولاردىڭ سانىنىڭ 42 پايىزعا تومەندەگەنىن اتاپ كورسەتتى. ءبىراق ەڭ ءبىر قيىنى، تەڭىز ارقىلى ەۋروپاعا باراتىنداردىڭ اراسىندا حابارسىز كەتەتىندەر كۇرت ءوستى. سوڭعى التى ايدا تەڭىز ارقىلى توتە جولمەن جۇرمەك بولعان 18 ادامنىڭ بىرەۋى قايتىس بولادى نەمەسە ءىز- ءتۇسسىز كەتەدى. وتكەن جىلدىڭ قاڭتار -  ماۋسىم ايلارىندا 43 ادام سۋعا كەتسە، بيىل 1600 ميگرانتتى تەڭىز ءتۇبى جۇتتى. ب ۇ ۇ- نىڭ بوسقىندار جونىندەگى اگەنتتىگىنىڭ ەۋروپا بيۋروسىنىڭ ديرەكتورى پاسكال مورونىڭ ايتۋىنشا، «جەرورتا تەڭىزى قازىرگى ۋاقىتتا ميگرانتتار ءۇشىن توتە، ءبىراق ەڭ قاۋىپتى جول بولىپ وتىر. الايدا تەڭىز ارقىلى اعىلعانداردىڭ سانى توقتاماي وتىر. سوندىقتان ەۋرووداق مەملەكەتىنىڭ باسشىلارى بوسقىنداردى زاڭدى جولمەن ەلگە اكەلۋ جولىن قاراستىرۋ كەرەك» .

 بەرىك بەيسەن ۇلى

www.aikyn.kz