شىعىس قازاقستاننىڭ اۋىلدارىندا اعىلشىن ءتىلىن تەگىن وقىتاتىن كۋرستار اشىلىپ جاتىر

وسكەمەن. قازاقپارات - «نۇر وتان» پارتياسىنىڭ ءۇش تىلدىلىككە كوشۋ جوباسى اياسىندا شىعىس قازاقستاننىڭ اۋىل مەكتەپتەرىندە اعىلشىن ءتىلىن وقىتۋ كۋرستارى اشىلۋدا، دەپ حابارلايدى قازاقپارات ءتىلشىسى.

بۇگىنگە دەيىن 4 اۋىل كلۋبىندا شەت ءتىلىن وقىتۋ كۋرسى اشىلعان. تەگىن كۋرسقا اۋىلدىقتار قازىردىڭ وزىندە ۇلكەن قىزىعۋشىلىق تانىتىپ جاتىر. مىسالى، ريددەر قالاسىنا قاراستى بۋتاكوۆ اۋىلىنىڭ تۇرعىندارى «Talk now» كۋرسىنا قاتىسۋ ءۇشىن ءار اپتانىڭ سارسەنبىسىندە مەكتەپكە جينالۋدى ادەتكە اينالدىرعان. ولارعا اعىلشىن ءتىلىن بىلەتىن ەرىكتىلەر ءدارىس بەرمەك. ەرىكتىلەر توبىنىڭ جەتەكشىسى - اعىلشىن ءتىلىنىڭ وقىتۋشىسى اننا چەرنوۆا.

«مۇندا ءتىل ۇيرەنۋ تەگىن. سوندىقتان، ەڭكەيگەن قارت پەن ەڭبەكتەگەن بالاعا دا ەسىگىمىز اشىق. نيەت بىلدىرگەن 10 بالامەن جۇمىس ىستەپ جاتىرمىز. ولاردىڭ قاتارىنا ەرەسەكتەر دە قوسىلادى دەپ ويلايمىز» - دەيدى اننا چەرنوۆا.

 

ءدال وسىنداي كلۋب زىريان اۋدانىندا ءتىل وقىتۋ ورتالىعى جانىنان اشىلدى. «نۇر وتان» پارتياسىنىڭ اۋداندىق فيليالى ءتوراعاسىنىڭ ءبىرىنشى ورىنباسارى يرينا لىكوۆانىڭ ايتۋىنشا، بۇگىندە كلۋبقا كەلۋشىلەر 4 توپقا ءبولىنىپ ءتىل ۇيرەنۋدە.

«كۋرسقا جاسى 11-دەن اسقان وقۋشىلار مەن ەرەسەكتەر قابىلدانادى. ال وقىتۋ اپتاسىنا ءبىر رەت جۇرگىزىلەدى» - دەيدى پارتيا وكىلى.

ءۇرجار اۋدانىندا مۇنداي ورتالىق جۋىقتا اشىلماق. مۇندا ساباق اپتاسىنا 2 رەت وتەدى دەپ كۇتىلۋدە.

«بۇل اۋدانعا جاقىن كۇندەرى «جاس وتان» جاستار قاناتىنىڭ ەرىكتىلەرى «ەnglish for jastar»  جوباسى اياسىندا اتتانباقشى. ولار ءۇش اي بويى تۇرعىندارعا اعىلشىن ءتىلىن تەگىن ۇيرەتەدى» - دەيدى «نۇر وتان» پارتياسىنىڭ وبلىستىق فيليالىنىڭ باسپا ءسوز حاتشىسى ايگۇل بازاروۆا.

جىل سوڭىنا دەيىن باسقا 12 اۋداندا ءدال وسىنداي ءتىل ۇيرەنۋ كلۋبتارىن اشۋ جوسپارلانعان.