قازاق تەلەۆيزياسىنىڭ ارداگەرى حاميت حاسەنوۆكە ەسكەرتكىش تاقتا قويىلدى
1975-1978 -جىلدارى - قازاق ك س ر-ى مينيسترلەر كەڭەسىندەگى راديوحابارلار جانە تەلەديدار جونىندەگى مەملەكەتتىك كوميتەت ءتوراعاسى بولعان حاميت حاسەنوۆكە ابىلاي حان داڭعىلىنىڭ بويىندا، بۇرىنعى ءوزى تۇرعان ءۇيدىڭ قابىرعاسىنا ەسكەرتكىش تاقتاسى ءىلىندى.
قازاق تەلەۆيزياسىنىڭ كىرپىشىن قالاۋعا ۇلەس قوسقان حاميت حاسەنوۆ تۇسىندا «تاماشا»، «قىمىزحانا»، «ايتىس» سىندى باعدارلامالار جارىققا شىققان ەدى. سالتاناتتى شاراعا قوناق بولعان تەلەۆيزيا ارداگەرى، بىرنەشە بۋىن جۋرناليستەردىڭ ۇستازى قۇسمان يگىسىنوۆ قايراتكەردى ەسكە الدى.
«مەن قازاق راديوسىنا 1966 -جىلى كەلدىم. ال حامەڭ، حاميت حاسەن ۇلى ءبىزدىڭ راديوعا ءتوراعا ورىنباسارى بولىپ 1969 -جىلى كەلدى. 1975 -جىلعا دەيىن 6 جىل بويى ورىنباسار بولىپ وتىردى. 1983 -جىلعا دەيىن 8 جىل جىل ءتوراعا بولدى. ەكەۋىن قوسقاندا 15 جىل. مەن راديودا 20 جىل، تەلەديداردا 20 جىل، ءبارىن قوسقاندا 40 جىل ىستەدىم. 15 جىلىم حامەڭمەن بىرگە ءوتتى. حامەڭنىڭ سىرتتاي ەرەكشەلىگى بىلاي قاراساڭ سۇستى كورىنەتىن، قاباعى تۇيىڭكى. ال ەندى ىشكى جان دۇنيەسىنە كەلگەندە سونداي ءموپ-ءمولدىر، تازا، ادامگەرشىلىگى، كىسىلىگى كەرەمەت ەدى»، - دەدى قۇسمان يگىسىنوۆ.
قازاق تەلەۆيزياسى كوميتەتىنىڭ باسشىلارىنىڭ ءبىرى، ارنانىڭ ايماقتارداعى فيليالدارىنىڭ ەفيرگە شىعۋىنا تىكەلەي تۇرتكى بولعان كەڭەسباي ابەنوۆ تە اعا بۋىن ەڭبەگىنە باعا بەرىپ ءوتتى.
«حاميت حاسەن ۇلى ءبىزدىڭ كوميتەتتە كوپ جۇمىس ىستەگەن. اۋەلى راديو جونىندە ورىنباسار بولىپ كەلدى بىزگە. سول كەزدەردە مەن قازاق راديوسىنىڭ باس ينجەنەرى ەدىم. بىرگە جۇمىس جاسادىق. ءار حاباردى ارلەپ، كەرەمەتتەي جاسايتىن. تەلەۆيدەنيە قازاق راديوسىنان ءبولىنىپ شىقتى. ويتكەنى كوپتەگەن كادرلار راديودان تەلەۆيدەنيەگە اۋىستى. ءوز ۋاقىتىندا سول ءتوراعالار جاقسى جۇمىس ىستەدى. ارداگەرلەردى ۇمىتپايىق»، - دەدى كەڭەسباي ابەنوۆ.
شارا تىزگىنىن ۇستاعان نۇرتىلەۋ يمانعالي ۇلى ءوز كەزەگىندە تەلەۆيزيا سالاسىنداعى قولعا الىنۋعا ءتيىس شارۋالاردى قۇلاققاعىس ەتتى.
«قازاقتىڭ قارا شاڭىراعى قازاق تەلەۆيزياسىنىڭ، قازاق راديوسىنىڭ كيەسى بىزگە ءبىر قاراپ، كەتىپ قالعىسى كەپ، ءالى كەتە قويماي جۇرگەن سەكىلدى كورىنەدى ماعان. سول كيەنى ورالتۋدىڭ بۇگىن اسا ماڭىزدى ءبىر شاراسىن ىستەپ جاتىرمىز دەپ ەسەپتەيمىن. تاريحىمىزدى تانۋ - ءوزىمىزدى تانۋ. قازاق تەلەۆيزياسىنىڭ 60 جىلدان، قازاق راديوسىنىڭ 90 جىلدان استام تاريحى بار»، - دەدى نۇرتىلەۋ يمانعالي ۇلى.
ول حاميت حاسەن ۇلىنىڭ ىزدەۋشىسى بار ەكەنىن ايتىپ، كىندىگىنەن تاراعان 5 قىزى - الما، ءلايلا، زۋحرا، گۇلميرا، ەلميرانى ورتاعا شاقىرىپ، ءسوز بەردى.
«قازاقستان تەلەراديوكورپوراتسياسىنىڭ الماتى قالاسىنداعى فيليالى ديرەكتورى مارات ساندىقبايەۆقا جانە الماتى اكىمدىگى مادەنيەت جانە ارحيۆتەر باسقارماسىن ەرەكشە اتاپ وتەيىن. راحمەت سىزدەرگە ءبىزدى قولداپ، كومەك كورسەتكەندەرىڭىزگە. ءبىزدىڭ اكەمىز مەملەكەت قايراتكەرى بولعان، سونىمەن قاتار ۇلگىلى، قامقور اكە بولدى. انامىز ءانۋار قادىر قىزىمەن 40 جىل تاتۋ-ءتاتتى ءومىر ءسۇردى. 5 بالانى ءوسىردى. بىزگە جاقسى تاربيە، جوعارى ءبىلىم بەردى. ءبىز بۇگىن اكەمىزدىڭ 90 جىلدىعىنا ارناپ ەسكەرتكىش بەلگى قويىپ، پارىزىمىزدىڭ ءبىر پاراسىن وتەدىك»، - دەدى گۇلميرا حاسەن قىزى.
