ايگۇل يمانبايەۆانىڭ ۇلى فيلم ءتۇسىرىپ جاتىر

 استانا. قازاقپارات - ايگۇل يمانبايەۆانىڭ ۇلى اسىلجان اناسىن شىعارماشىلىق جولىنداعى ءبىرقاتار جەتىستىگىمەن قۋانتىپ ءجۇر.

اكەسى ءسابيت ءابدىحالىقوۆتىڭ جولىن قۋعان بولاشاق رەجيسسەردىڭ جاعىمدى جاڭالىعى جەتەرلىك ەكەن.

بۇل تۋرالى 31- ارنانىڭ «ايتا بەرسىن» باعدارلاماسى حابارلايدى.

يمانبايەۆانىڭ ايتۋىنشا، ەكى جىل پراگادا ءبىلىم العان ۇلى قازىرگى ۋاقىتتا اناسىنىڭ جانىندا. اسىلجان ءارى قاراي ءبىلىمىن قازاقستاندا شىڭداماق. سونداي-اق، جاس رەجيسسەرگە لوندون ۋنيۆەرسيتەتىنەن ماگيستراتۋراعا شاقىرتۋ ءتۇسىپتى. الايدا اسىلجاننىڭ ءوزى بالا كەزىنەن امەريكاعا بارۋدى ارمانداعاندىقتان، ءبارى بولاشاقتىڭ ەنشىسىندە، دەيدى اكتريسا.

«ۇلىم ۇيدە، مەنىڭ قاسىمدا. ەكەۋىمىز دە الماتىدا ءجۇرمىز. ءوزىنىڭ ەۋروپانىڭ پراگا قالاسىندا ءبىلىم العانىن بىلەسىزدەر. جۋىردا سول جاقتاعى ەكى جىلدىق وقۋىن ءتامامداپ كەلدى. اكەسىمەن اقىلداسا وتىرىپ بولاشاققا قۇرعان جوسپارلارى بار. سول سەبەپتى قازىر قازاقستانداعى وقۋىن شەتەلگە اۋىستىرۋ پروتسەسى ءجۇرىپ جاتىر. قالعان ەكى جىلىن وسىندا ءتامامداسا، ءارى قاراي ماگيستراتۋرانى شەتەلدە وقيتىن بولادى. ءوزىنىڭ ارمانى امەريكاعا كەتۋ بولعاندىقتان، وقۋىن سول جاقتا جالعاستىرۋى مۇمكىن. جالپى ارى قاراي نە ىستەيتىنىن ءوزى بىلەدى. ءبىزدىڭ اتا-انا رەتىندە باستى مىندەتىمىز - قولىنا ديپلومىن الىپ بەرۋ»، - دەدى ايگۇل يمانبايەۆا.

اسىلجان بۇگىندە ۇلكەن جوبامەن اينالىسىپ جۇرگەن كورىنەدى. اكەسىنىڭ جولىن قۋعان جاس رەجيسسەردىڭ ايتۋىنشا، ءوزىنىڭ جاڭا دا اۋقىمدى جوباسى استانانىڭ 20 جىلدىق مەرەيتويىنا ارنالماق.

«ازىرگە تۋىندىنى شارتتى تۇردە «تاۋەلسىزدىك جوباسى» دەپ اتادىم. ءبىراق الداعى ۋاقىتتا اتاۋى اۋىسۋى مۇمكىن. ول ءۇش قالادا تۇسىرىلمەك. ياعني پراگا مەن الماتى قالاسىنداعى تۇسىرىلىمدەر اياقتالدى. ەندى ءتۇسىرىلىمدى استانا قالاسىندا جالعاستىراتىن بولامىز. وعان ەۋروپاداعى جانە استانا مەن الماتى قالاسىنداعى دوستارىم دا اتسالىسىپ جاتىر. اۆتورلىق كينو بولعاندىقتان، ارالىق ستيلدە ءتۇسىرىلىپ جاتىر. بولاشاقتا وزدەرىڭىز دە كورە جاتارسىزدار. ءبىراق فەستيۆالگە قاتىسىپ، كينوتەاترلارعا جارق ەتىپ شىعادى دەگەن وي جوق. جالپى بۇعان ۋاقىت كەرەك. ول تولىقتاي ءبىر-ەكى جىلدىڭ كولەمىندە دايىن بولماق»، - دەدى ول.

ەسكە سالا كەتەيىك، بۇعان دەيىن يمانبايەۆا ۇلىنىڭ جار تاڭداۋىنا ارالاساتىنىن ايتىپ، بولاشاق كەلىنىنە قاتىستى بارلىق سالت-ءداستۇردى «شىمكەنتشە» جاسايتىنىن ايتقان ەدى.