ب ۇ ۇ باس حاتشىسى يدليب ايماعىندا قارۋلى قاقتىعىستى بولدىرماۋعا شاقىردى

استانا. قازاقپارات - ب ۇ ۇ باس حاتشىسى انتونيۋ گۋتەررەش سيريانىڭ يدليب ايماعىندا اۋقىمدى قارۋلى قاقتىعىستى بولدىرماۋعا شاقىردى. بۇل تۋرالى ۇيىم باسشىسى وسى وڭىرگە قاتىستى ارنايى كونفەرەنسيادا مالىمدەدى.

 ونىڭ ايتۋىنشا، اسكەري ارەكەت گۋمانيتارلىق داعدارىسقا اكەلەدى. سوندىقتان قاقتىعىسقا تارتىلعان تاراپتارى بىرلەسىپ، مۇنداي جاعدايدى بولدىرماۋعا ۇندەدى.

 انتونيۋ گۋتەررەش، ب ۇ ۇ باس حاتشىسى:

 - يدليب سيرياداعى سوڭعى دەەسكالاتسيا ايماعى بولىپ تابىلادى. تاراپتار مۇندا گۋمانيتارلىق داعدارىسقا اكەلەتىن قاندى قىرعىندى بولدىرماۋعا كۇش سالۋى ءتيىس. ارينە لاڭكەستىك توپتارعا توزۋگە بولمايدى. ءبىراق ولارمەن كۇرەس تاراپتاردى حالىقارالىق قۇقىق بويىنشا مىندەتتەرىنەن بوساتپايدى.

 ال ب ۇ ۇ- نىڭ بوسقىندار جونىندەگى جوعارعى كوميسسارى حالىقارالىق قاۋىمداستىقتان سيريالىق بوسقىندارعا 270 ميلليون دوللار بولۋگە شاقىردى. بۇل قاقتىعىستان ءار جەردە باس ساۋعالاعان ادامداردىڭ قىسقى دايىندىعىنا قاجەت. ولاردىڭ 200 ميلليونى تۇركيا، ليۆان، يوردانيا، يراك جانە ەگيپەتتەگى سيريالىق بوسقىندارعا جۇمسالسا، قالعان بولىگى ەل ىشىندە كوشكەن جاندارعا بولىنبەك. ال رەسمي دەرەككە سۇيەنسەك، تاياۋ شىعىس ەلدەرىندەگى سيريالىق بوسقىنداردىڭ سانى 5 جارىم ميلليوننان اسادى ەكەن.

www.24.kz