جاپونيادا قىپشاق باتىرلارىنىڭ مۇراجايى اشىلعان

استانا. قازاقپارات - يۋان پاتشالىعىندا قىپشاق باتىرلارىنىڭ ءرولى قانداي بولدى؟ ءدال وسى تاقىرىپتا «دەشتى- قىپشاق» عىلىمي زەرتتەۋ ورتالىعى مەن «مەملەكەت تاريحى ينستيتۋتى» بىرلەسىپ دوڭگەلەك ۇستەل وتكىزدى.

 «بابالار ىزىمەن» تاريحي- عىلىمي ەكسپەديتسياسىنىڭ جەتەكشىسى ساپار ىسقاقوۆتىڭ شاقىرۋىمەن جيىنعا جاپونياداعى «ريككيو» ۋنيۆەرسيتەتىنىڭ پروفەسسورى ياسۋحيرو يوكايچي كەلگەن. ونىڭ نەگىزگى زەرتتەۋ تاقىرىبى يۋان يمپەرياسىنىڭ تاريحى ەكەن.

 ايتۋىنشا، كەزىندە جاپونياعا شابۋىلداعان قۇبىلاي حاننىڭ جاۋىنگەرلەرى نەگىزىنەن قىپشاق، قاڭلى، نايمان جانە جالايىر رۋىنىڭ باتىرلارىنان قۇرىلعان. بۇگىندە فۋكۋوكا قالاسىندا ونى دالەلدەيتىن مۇراجاي جۇمىس ىستەيدى. جاۋىنگەرلەردىڭ اسكەري كيىمدەرى، دۋلىعالارى، قارۋ- جاراقتارى تولىقتاي تۇركى جانە دەشتى قىپشاقتاردىكى.

 ياسۋحيرو يوكايچي، جاپونياداعى «ريككيو» ۋنيۆەرسيتەتىنىڭ پروفەسسورى:

- موڭعول يمپەرياسىندا تۇركىلەردىڭ، سونىڭ ىشىندە قىپشاقتاردىڭ ورنى ەرەكشە. تاريحي دەرەكتەرگە قاراعاندا كوبىنە حاننىڭ جەكە جاساعى قىپشاق باتىرلارىنان تۇرعان. يۋان پاتشاسى قۇبىلاي جاپونياعا شابۋىلداعاندا جاۋىنگەرلەرىنىڭ اراسىندا تۇركىلەردەن شىققان قولباسشىلار بولعان. سوعىستان كەيىن ولاردىڭ كەيبىرى ەلىنە قايتسا، كەيبىرى سول جەردە قالىپ جەرگىلىكتى حالىقپەن ءسىڭىسىپ كەتتى.

www.24.kz