ءجۇرسىن ەرمان: ايتىس - ۇلتتىق رۋحتى كوتەرەتىن ونەر
ايتىسقا بەكارىس شويبەكوۆ، ەركەبۇلان قاينازار، مۇحتار نيازوۆ، جانسايا مۋسينا، رۇستەم قايىرتاي سىندى تانىمال اقىندار قاتىسادى.
قازاقى ونەردىڭ جىل اينالىپ الماتىعا قايتا كەلگەنى ايتىس سۇيەر اعايىندى قۋانتتى. اتتارى بايگەگە شاباردا، اتبەگىگە «ءسىز نە كۇتەسىز؟» دەپ سۇراق قويادى. ءبىز دە الاتاۋ تورىندەگى الامان الدىندا ايتىستىڭ جاناشىرى، بەلگىلى اقىن ءجۇرسىن ەرماننان ءجون سۇراپ كوردىك.
- ايتىستى ۇيىمداستىرۋ بارىسىندا قيىندىق تۋدى ما؟
- قيىندىق دەگەن قاشان دا كوپ. ايتىس الاتاۋ اۋدانىنىڭ 10 جىلدىعى مەن «الماتى اقشامى» گازەتىنىڭ 30 جىلدىعىنا ارنالادى. مانىزوروۆ باعدات سايلاۋباي ۇلى - وسى اۋداندى قۇرعانداردىڭ ءبىرى. سول ازامات ايتىستى وتكىزۋگە قولعابىس ەتتى. «تاسكرەديت» اتتى كومپانيا ايتىستى 3 جىلدان بەرى قولداپ كەلەدى. باس ديرەكتورى دۋلات تاستەكەيەۆ كەم كەتىكتى تۇگەندەپ بەردى. «اي-سەر» كومپانياسى دا ءوز كومەگىن ۇسىندى. 1988-جىلى الماتىدا وتكەن ايتىستا اقىندار «الماتى اتىمەن نەگە گازەت شىقپايدى» دەسكەن. سونىڭ ناتيجەسىندە، «الماتى اقشامى» گازەتى دۇنيەگە كەلدى. بيىل اتالعان گازەتكە - 30 جىل. گازەتتىڭ باس رەداكتورى قالي سارسەنباي - وسى ايتىستى ۇيىمداستىرۋعا ۇيىتقى بولعانداردىڭ ءبىرى.
- ەل كۇتكەن جۇيرىكتەردىڭ ءبىرازى جوق. تىزىمنەن رينات زايىتوۆ، مەيىربەك سۇلتانحاندى كورە الماي ءجۇرمىز. نەگە؟
- بۇل ايتىسقا 16 اقىن قاتىسادى. وسى جولى جاستاردى جانە ءبىراز ءوڭىردىڭ اقىندارى جينالدى. بارلىعىن بىردەي ءار ايتىسقا شىعارا المايمىز. بۇيىرتسا، قىرقۇيەكتىڭ 20 سى كۇنى اتىراۋ وبلىسىندا، قازاننىڭ 4 ءى كۇنى قوستانايدا رەسپۋبليكالىق، 21-22- كۇنى استانادا حالىقارالىق ايتىس وتەدى. مىنە، وسى دودالارعا قالعان اقىنداردى كەزەكپەن قاتىستىرامىز. سوندىقتان مىناۋ اقىن قاتىسپاي قالىپتى دەپ استار ىزدەۋدىڭ قاجەتى جوق. جىر بايگەسىنە جاستار قاتىسۋى كەرەك. ولار - ايتىستىڭ ەرتەڭى.
- جالپى، اقىنداردى ايتىسقا قالاي ىرىكتەپ الاسىز؟
- بىزدە اقىنداردىڭ رەيتينگى بار. 3 جىلدا ءبىر جاڭارتامىز. مىنە، سولاردى ۇسىنامىز. كىم بابىندا، كىمنىڭ جىرلارى ورالىمدى سولاردى تاڭداپ الامىز. جاستاردىڭ ىشىنەن وزا شاۋىپ جۇرگەندەرىن ۇمىت قالدىرمايمىز. بىزدەگى پرينتسپ - قاراپايىم.
- بۇل ايتىستا كەيىنگىلەرى ءتارىزدى ساحنادا تۇرىپ جەرەبە تارتۋ بولا ما، الدە جۇپتار بەلگىلى مە؟
- ول جاعى ءالى بەلگىسىز. قازىلار القاسىنىڭ ءتوراعاسى شەشەدى. وسى ورايدا ايتىستىڭ ءادىل باعاسىن بەرەتىندەرمەن تانىستىرىپ وتەيىن. قازىلار القاسىنىڭ قۇرامىندا: نۇرتورە ءجۇسىپ، قالي سارسەنباي، جاناربەك ءاشىمجان، ساعاتبەك مەدەۋبەك ۇلى، تەمىرحان تەبەكەنوۆ بار. بۇدان بولەك، باۋىرجان حاليوللا مەن قويلىباي اسانوۆ تاۋەلسىز ساراپشىلىق ەتەدى.
- ايتىسقا كەلە الماي قالعاندارعا قاي ارنانى قوسۋعا كەڭەس بەرەسىز؟ تەلەۆيزيالىق قولداۋ بولا ما؟
- ايتىستى «الماتى» تەلەارناسىنان كورسەتەدى. «قازاق راديوسى»، «شالقار» راديولارىنان ايتىستىڭ اۋديو-نۇسقاسىن تىڭداي الاسىزدار. الماتىلىق اعايىن ايتىستى ساعىنعان بولار. بارلىعى دەمەسە دە، ءبىرازى كەلەدى دەگەن ويدامىن. ايتىس - ۇلتتىق رۋحتى كوتەرەتىن ونەر. تەلەديداردان ايتىس كورگەن قىزىقتى، الايدا كورەرمەن بولىپ وتىرىپ كورگەن ءبىر باسقا. اقىنداردىڭ شۇرايلى شۋماقتارى مەن اسەرلى اۋەنى جانىڭىزدى جادىراتىپ، ايىزىڭىزدى قاندىرادى. سول ءۇشىن دە كىل جۇيرىكتەردى بايگەگە قوستىق. باعاسىن ءادىلقازى مەن كوزىقاراقتى كورەرمەن بەرە جاتار.
- اڭگىمەڭىزگە راقمەت!
سۇحباتتاسقان
ايزات جولداس
«ايقىن»
