اق ءۇي: كيم چەن ىن دونالد ترامپپەن تاعى كەزدەسكىسى كەلەدى

استانا. قازاقپارات - ا ق ش سولتۇستىك كورەيامەن قارىم- قاتىناسقا قاتىستى قاراما- قايشى ەكى مالىمدەمە جاسادى. اق ءۇيدىڭ باسپا ءسوز حاتشىسى سارا ساندەرستىڭ حابارلاۋىنشا، پرەزيدەنت دونالد ترامپ سولتۇستىك كورەيا باسشىسى كيم چەن ىننەن «جاڭا سامميت وتكىزۋگە قىزىعۋشىلىق تانىتقان» حات العان.

ا ق ش پرەزيدەنتى ەكى ەل باسشىلارى ماۋسىمدا سينگاپۋردە العاش كەزدەسكەننەن بەرى سولتۇستىك كورەيا يادرولىق قارۋسىزدانۋ باعىتىندا ناقتى ارەكەتتەر جاساماسا دا، اق ءۇي اپپاراتىنا جوعارى دەڭگەيدەگى كەزدەسۋ وتكىزۋگە دايىندىق جۇمىستارىن باستاۋعا پارمەن بەردى.

ال ساندەرستىڭ مالىمدەمەسىنەن بىرنەشە ساعات بۇرىن ترامپتىڭ ۇلتتىق قاۋىپسىزدىك بويىنشا كەڭەسشىسى دجون بولتون ا ق ش كەلىسسوزگە اشىق ەكەنىن، ءبىراق سولتۇستىك كورەيا يادرولىق قارۋدان ارىلۋ شارالارىن جاساماي وتىرعانىن مالىمدەگەن.

وتكەن ايدا ترامپ مەملەكەتتىك حاتشى مايك پومپەونىڭ سولتۇستىك كورەياعا ساپارىن «ستراتەگيالىق ديالوگتا ىلگەرى جىلجۋ جوعىن» ايتىپ، توقتاتىپ تاستاعان ەدى. الايدا، وتكەن جەكسەنبىدە ا ق ش پرەزيدەنتى سولتۇستىك كورەيانىڭ قۇرىلعان كۇنىنە وراي پحەنياندا وتكەن پارادتا بۇرىنعىداي ا ق ش- قا جەتە الاتىن بالليستيكالىق زىمىراندار كورسەتىلمەگەنىن وڭ باعالاعان. «بۇل وتە جاعىمدى بەلگى. راحمەت، ءتوراعا كيم. ءبىز ولاردىڭ قانشالىقتى دۇرىس ەمەس ەكەنىن بارلىعىنا دالەلدەيمىز. ءبىر- ءبىرىن قولدايتىن ەكى ادامنىڭ ديالوگىنان اسقان ەشنارسە جوق» دەپ جازعان ترامپ Twitter- دە.

اق ءۇي سونىمەن قاتار پحەنيانداعى پارادتا ىلىنگەن ترانسپارانتتاردىڭ كوبى ەلدىڭ اسكەري الەۋەتىن كۇشەيتۋ ەمەس، ەكونوميكالىق دامۋعا قاتىستى بولعانىن وڭ ارەكەت دەپ باعالاعان.

www.azattyq.org