ەردوعان سيرياداعى سوعىستى توقتاتۋعا شاقىردى

استانا. قازاقپارات - سيريانىڭ يدليب پروۆينتسياسىنداعى قاقتىعىستىڭ الدىن الماسا ودان كەيىنگى جاعدايدىڭ جاۋاپكەرشىلىگىن الەمدىك قاۋىمداستىق بىرگە ارقالايدى.

تۇركيا پرەزيدەنتى رەجەپ تايىپ ەردوعان Wall Street Journal باسىلىمىندا شىققان ماقالاسىندا وسىلاي دەگەن. ونىڭ سوزىنشە، باشار اساد ارمياسىنىڭ يدليبكە شابۋىل جاساۋى گۋمانيتارلىق اپات ءارى تۇركيا مەن ەۋروپانىڭ تىنىشتىعىنا قاۋىپ توندىرەدى.

ەردوعان «ا ق ش داماسكىدە بار دەلىنگەن حيميالىق قارۋدى عانا جالعىز قاۋىپ دەپ قاراۋدى دوعارۋى كەرەك» دەگەن. ول «جاي قارۋدان دا كوپ ادام ءولىپ جاتقانىن» ايتقان. تۇركيا پرەزيدەنتى بۇعان قوسا يران مەن رەسەيدى يدليبكە جاسالىپ جاتقان شابۋىلدى توقتاتۋعا، ال وزگە مەملەكەتتەردىڭ باسشىلارىن «سيريادا ساياسي تۇراقتىلىقتى قالپىنا كەلتىرۋ ءۇشىن ءوز ابىرويلارىن پايدالانۋعا» شاقىرعان.

وتكەن اپتادا تۇركيا پرەزيدەنتى ۆلاديمير پۋتين مەن حاسان روۋحانيمەن كەزدەسىپ، يدليبتى جاۋلاپ الۋدان باس تارتۋعا، بۇل پروۆينسيانى سيريا وپپوزيتسياسىنىڭ يەلىگىنە بەرۋگە كوندىرمەك بولعان. ءبىراق ماسكەۋ مەن تەگەران، ب ۇ ۇ مەن وزگە دە ەلدەر ەردوعاننىڭ تالابىن ەسكەرۋسىز قالدىردى. قۇقىق قورعاۋشىلاردىڭ ايتۋىنشا، رەسەي مەن سيريا اۋە كۇشتەرىنىڭ يدليبتى بومبالاۋىنان قاتارلارىندا ايەلدەر مەن بالالار بار ونداعان بەيبىت تۇرعىن قازا تاپقان. بىرنەشە اۋرۋحانا قيراعان.

قىركۇيەكتىڭ 11- كۇنى Reuters «يران سىرتقى ىستەر مينيسترلىگى يدليبتەگى شايقاستا گۋمانيتارلىق اپات بولدىرماۋعا ۋادە بەردى» دەپ حابارلادى.

ا ق ش داماسكىگە يدليبتە «حيميالىق قارۋ قولدانسا زاردابى بولاتىنىن» بىرنەشە رەت ەسكەرتكەن. ءبىراق ازىرگە قاقتىعىسقا ارالاسقان جوق. كەيبىر اقپارات قۇرالدارى ۆاشينگتون لوندون مەن پاريجدى «حيميالىق قارۋ قولدانسا اسادتىڭ اسكەري نىساندارىنا بىرىگىپ سوققى جاساۋعا» كوندىرىپ جاتقانىن ايتقان.

انكارا يدليبتە ۇلكەن سوعىس بولسا شەكاراسىنا كەلەتىن بوسقىندار سانى كۇرت كوبەيەدى دەپ الاڭدايدى. سوڭعى اقپارات بويىنشا، قازىر يدليبتە ءۇش ميلليونداي ادام، ونىڭ ىشىندە ءبىر ميلليونعا جۋىق بالا تۇرىپ جاتىر.

azattyq.org