قازاقستاندىق سپورتشى نىسانا كوزدەۋدەن الەم چەمپيوناتىنىڭ جۇلدەگەرى اتاندى

استانا. قازاقپارات - قازاقستاندىق سپورتشى اندرەي حۋدياكوۆ اتۋ سپورتىنان وڭتۇستىك كورەيانىڭ چحاۆون قالاسىندا ءوتىپ جاتقان جاس وسپىرىمدەر اراسىنداعى الەم چەمپيوناتىندا قول مەدال جەڭىپ الدى، دەپ حابارلايدى قازاقپارات ءتىلشىسى.

ق ر ۇلتتىق وليمپيادالىق كوميتەتىنىڭ حابارلاۋىنشا، ول جىلجىلامى نىسانانى كوزدەۋ سايىسىندا رەسەي مەن ۋكراينا سپورتشىلارىنان قالىپ قويدى.

«بۇل مەنىڭ العاشقى چەمپيوناتىم. وسىنىڭ الدىندا تەك چەحيا گران-پري جارىسىنا قاتىسقان ەدىم. جارىس جوعارى دەڭگەيدە، مىقتى سپورتشىلار وتە كوپ. كورسەتكەن ناتيجەمە كوڭىلىم تولادى. بۇل مەنىڭ جەكە رەكوردىم. جارىستىڭ العاشقى جارتىسىندا كوش باستاپ كەلە جاتقان ەدىم، وكىنىشكە وراي ەكىنشى جارتىسىندا قوبالجۋ كەسىرىن تيگىزگەن بولار، ءسال ناشار ونەر كورسەتتىم. الداعى جارىستاردا قاتەلىك جىبەرمەۋگە تىرىسامىن. ەڭبەك ەتىپ، جاتتىعۋ جاساۋ كەرەك. شىنىمدى ايتسام، جۇلدەلى ورىن الامىن دەپ، مەدال، ناتيجە تۋرالى ويلامادىم. ناتيجەسىندە الەم چەمپيوناتىندا جەكە رەكوردىمدى ورناتىپ، ءۇشىنشى ورىن الدىم»، - دەيدى اندرەي حۋدياكوۆ.

جارىسقا قازاقستاننان 15 سپورتشى قاتىستى. قىركۇيەكتىڭ 2- كۇنى جالاۋى جەلبىرەگەن دودا 15- قىركۇيەكتە مارەسىنە جەتەدى. الەم چەمپيوناتىنا 90 ەلدىڭ مەرگەندەرى قاتىسۋدا.

اۆتور: كۇنسۇلتان وتارباي