22:33, 11 - قىركۇيەك 2018 | GMT +5
ازيادا چەمپيونى كوكشەتاۋداعى ج و و-دا تەگىن ءبىلىم الاتىن بولدى
كوكشەتاۋ. قازاقپارات- يندونەزيادا وتكەن جازعى 18- ازيا ويىندارىندا سەمسەرلەسۋدەن التىن جانە كۇمىس مەدال العان دميتري الەكسانيندى ا. مىرزاحمەتوۆ اتىنداعى كوكشەتاۋ ۋنيۆەرسيتەتىنىڭ ۇجىمى قارسى الدى، دەپ حابارلايدى قازاقپارات ءتىلشىسى اقمولا وبلىسىنىڭ دەنە شىنىقتىرۋ جانە سپورت باسقارماسىنىڭ باسپا ءسوز قىزمەتىنە سىلتەمە جاساپ.
كەزدەسۋدە ۋنيۆەرسيتەت باسشىسى ساعىنتاي ەلۋبايەۆ سپورتشى ۇجىم اتىنان جەڭىسىمەن قۇتتىقتاي كەلە، تەگىن ءبىلىم الۋ گرانتىن سالتاناتتى تۇردە تاپسىردى.
قازىرگى كەزدە، دميتري الەكسانين اتالمىش جوعارى ءبىلىم ورداسىندا «دەنە شىنىقتىرۋ جانە سپورت» فاكۋلتەتىنىڭ 3-كۋرسىندا وقيدى.
«دميتري تاريحي جەڭىسكە قول جەتكىزدى. بۇل سەمسەرلەسۋدەن ۇلتتىق قۇرامانىڭ قورجىنىنداعى تۇڭعىش التىن مەدال. ونىڭ جەڭىسى بۇكىل ەلىمىزدىڭ، ونىڭ ىشىندە ءبىزدىڭ ۋنيۆەرسيتەتتىڭ جەڭىسى. الداعى جارىستاردا دا جەڭىسكە جەتۋىنە تىلەكتەستىگىمدى بىلدىرەمىن»، دەپ اتاپ ءوتتى س. ەلۋبايەۆ.
ءوز كەزەگىندە دميتري دە بايراقتى جارىستا وزىنە جانكۇيەرلىك تانىتقان جەرلەستەرىنە العىس ءبىلدىردى. سونداي-اق، قازاقستاننىڭ كوك تۋىنىڭ استىندا جارىسقا قاتىسۋ ۇلكەن مارتەبە ەكەنىن ايتتى.
