مىسىرلىق جازۋشى قازاق قىزى تۋرالى جاڭا رومانىن تانىستىردى
«موڭعول قىزى» دەپ اتالاتىن جاڭا رومان بالقاش ماڭىندا تۋىپ- ءوسىپ، امەريكاعا وقۋعا اتتانعان قازاق قىزى تۋرالى اڭگىمەلەيدى.
«كەيىپكەردىڭ بەت- پىشىنىنە بايلانىستى، جاڭا ورتاداعى دوستارى ونى «موڭعول» دەپ اتاپ كەتەدى. ول ءوزىنىڭ قازاق ەكەنىن، ءوز ەلىنىڭ تاريحى مەن مادەنيەتىن ناسيحاتتايدى جانە تابيعاتتى قورعاۋ بويىنشا باستامالار كوتەرەدى. دوستارىن قازاقستانعا اكەلىپ، وتباسىمەن تانىستىرادى. رومان سوڭىندا قازاق قىزى ب ۇ ۇ مىنبەرىندە ءسوز سويلەپ، ويعا العان ماقساتتارىنا جەتەدى»، - دەپ قىسقاشا ءتۇسىندىردى جازۋشى جۋرناليستەرگە بەرگەن سۇحباتىندا.
جازۋشىنىڭ ايتۋىنشا، كىتاپ ءبىر اي بۇرىن مىڭ تيراجبەن اراب تىلىندە جارىق كوردى. بۇگىنگى كونگرەستە ول ۇلتتىق اكادەميالىق كىتاپحاناعا كىتاپتىڭ 10 داناسىن تارتۋ ەتپەك.
«كىتاپتى وزگە تىلدەرگە اۋدارۋ، رومان جەلىسىمەن كارتينا مەن مۋلتفيلمدەر ءتۇسىرۋ قۇقىعىن كىتاپحاناعا بەرەمىن. مەن قازاقستان تۋرالى كوپ وقىدىم، كەي قازاقتاردان دا ارتىق بىلەمىن دەپ ايتسام، ارتىق ەمەس. قازاق دالاسىنا شەكسىز عاشىقپىن»، - دەپ اعىنان جارىلدى جازۋشى.
سونىمەن بىرگە، ماگدي حاليم قازاقستان تۋرالى ەكىنشى كىتابىن ازىرلەپ جاتقانىن جەتكىزدى. ەكىنشى جيناق وتكەن عاسىرداعى قۋعىن- سۇرگىن قۇرباندارى جازالانعان گۋلاگ تاقىرىبىنا ارنالعان.
«گۋلاگ تاقىرىبىن جارتى جىل بويى زەرتتەپ، ارحيۆتىك قۇجاتتارمەن جۇمىس ىستەدىم. ونىڭ تاريحىن جاڭا نۇسقادا كورسەتكىم كەلەدى. رومان جەلىسى ءۇش ادامنىڭ حيكاياسى بويىنشا ءوربىپ وتىرادى. نەگىزگى كەيىپكەرلەرىنىڭ ازىرگە قۇپيا بولعانىن قالايمىن. بۇگىنگى شارادان سوڭ، گۋلاگ ورنىنداعى مۋزەيگە مىندەتتى تۇردە بارامىن. مۋزەيدەن العان اسەرىممەن كىتاپتى تولىق اياقتايمىن»، - دەدى م. حاليم.
اۆتور: ايجان سەرىكجان قىزى
