ەلباسى پرەزيدەنت اكىمشىلىگىنىڭ باسشىلىق قۇرامىمەن كەزدەستى

استانا. قازاقپارات - مەملەكەت باسشىسى پرەزيدەنت اكىمشىلىگىنىڭ باسشىلىق قۇرامىمەن كەزدەستى، دەپ حابارلايدى اقوردانىڭ باسپا ءسوز قىزمەتى.

ەلباسى كەزدەسۋ بارىسىندا ادىلبەك جاقسىبەكوۆكە پرەزيدەنت اكىمشىلىگىنىڭ باسشىسى لاۋازىمىندا جانە باسقا دا مەملەكەتتىك قىزمەتتەردە اتقارعان جۇمىسى ءۇشىن العىس ايتىپ، ونىڭ قازاقستان رەسپۋبليكاسى مەملەكەتتىلىگىن قالىپتاستىرۋ جانە دامىتۋ ىسىنە زور ۇلەس قوسقانىن ەرەكشە اتاپ ءوتتى.

- ۇزاق جىلداردان بەرى مەنىمەن بىرگە جۇمىس ىستەپ كەلە جاتقان ادىلبەك رىسكەلدى ۇلىن جاقسى بىلەسىزدەر. ول ەلوردانىڭ العاشقى اكىمى بولدى، بارلىق لاۋازىمدى قىزمەتتەردە جاۋاپكەرشىلىكپەن ءارى ادال ەڭبەك ەتتى. وعان زور دەنساۋلىق پەن تابىس تىلەيمىن، - دەدى قازاقستان پرەزيدەنتى.

نۇرسۇلتان نازاربايەۆ جيىنعا قاتىسۋشىلارعا پرەزيدەنت اكىمشىلىگىنىڭ جاڭا باسشىسى اسەت يسەكەشيەۆتى تانىستىردى.

 - اسەت ورەنتاي ۇلى مەنىڭ كومەكشىم بولدى، مينيستر، پرەمەر- ءمينيستردىڭ ورىنباسارى قىزمەتتەرىن اتقاردى. ول باس قالامىزدا جۇمىس ىستەگەن سوڭعى ەكى جارىم جىل ىشىندە ەلوردالىقتاردىڭ جوعارى باعاسىنا يە بولدى. ول بەلسەندى ءارى كرەاتيۆتى ۇستانىممەن ەرەكشەلەنەدى. قازىر بىزگە ءدال وسىنداي ادام كەرەك. يسەكەشيەۆ ەلورداعا اكىم بولعان ۋاقىتتا ءبىز «ەكسپو-2017» كورمەسىن جانە استانانىڭ 20 جىلدىعىن ابىرويمەن وتكىزدىك. اسەت ورەنتاي ۇلى بۇل مىندەتتى دە لايىقتى ورىنداي الاتىنىنا سەنىمدىمىن، - دەدى مەملەكەت باسشىسى.

ەلباسى جيىن سوڭىندا ەلىمىزدىڭ ەكونوميكالىق ءوسىمىن جانە حالىقتىڭ ءال- اۋقاتىن ودان ءارى ارتتىرۋ ىسىندە پرەزيدەنت اكىمشىلىگىنىڭ باستى ءرول اتقاراتىنىن اتاپ ءوتىپ، ونىڭ الداعى كەزەڭگە ارنالعان جۇمىستارىنىڭ نەگىزگى باسىمدىقتارىن بەلگىلەپ بەردى.

- اپپاراتتىڭ الدىندا بۇعان دەيىن قابىلدانعان مەملەكەتتىك باعدارلامالاردىڭ جۇزەگە اسىرىلۋىن جانە ورىندالۋىن قامتاماسىز ەتۋ جونىندەگى ماڭىزدى مىندەت تۇر. بۇگىندە جۇمىس اۋقىمى وڭىرلىك دەڭگەيگە اۋىسقانىن ەرەكشە اتاپ وتكىم كەلەدى جانە بارلىق دەڭگەيدەگى اكىمدەردىڭ قىزمەتىن ۇيلەستىرۋ، ولاردىڭ ءوزارا ىقپالداسا ەڭبەك ەتۋىنە كومەكتەسۋ قاجەت، - دەدى نۇرسۇلتان نازاربايەۆ.