باقىتجان ساعىنتايەۆ اقمولا اكىمىنە: جاۋاپتى قيسىنىن كەلتىرىپ بەرسەڭىزشى
ۇكىمەت باسشىسىنىڭ ايتۋىنشا، قىزىلوردا وبلىسى رەسپۋبليكالىق بيۋدجەتتە بولىنگەن قارجىنىڭ 2,9 ميلليارد تەڭگەسىن يگەرمەگەن.
وبلىس باسشىسى قىرىمبەك كوشەربايەۆتىڭ بايانداۋىنشا، 2018 -جىلدىڭ 8 ايىنىڭ قورىتىندىسى بويىنشا رەسپۋبليكالىق بيۋدجەت قاراجاتتارى 90 پايىزعا يگەرىلگەن. يگەرىلمەگەن سوما 2,9 ميلليارد تەڭگەنى قۇرايدى.
«كولىك- ينفراقۇرىلىمنىڭ باسىم جوبالارى بويىنشا 15 جوبانىڭ 900 ميلليون تەڭگەسى يگەرىلگەن جوق. اپتانىڭ سوڭىنا دەيىن كەلىسىمگە وتىرىپ، قازىناشىلىققا تىركەلەدى. يگەرۋ جاعىنان پروبلەما بولمايدى. كەلەسى تۇرعىن ءۇي قۇرىلىسى بويىنشا 725 ميلليون تەڭگە كونكۋرستاردىڭ بىرنەشە رەت جاريالانۋىنا بايلانىستى يگەرىلمەگەن بولاتىن. قارجى تولىعىمەن يگەرىلدى. جەرگىلىكتى ينفراقۇرىلىم بويىنشا 675 ميلليون تەڭگە سوت پروتسەستەرىنە بايلانىستى يگەرىلمەدى. ەكى نىسان بويىنشا سوت شەشىمى شىقتى، 13 جانە 20 - قىركۇيەكتە كۇشىنە ەنەدى. مەردىگەرلەرمەن كەلىسىپ قارجىنى يگەرەمىز. سۋ جانە كارىز بويىنشا 590 ميلليون تەڭگە يگەرىلمەگەن بولاتىن. مەردىگەرلەرمەن كەزدەسىپ، قارجىنىڭ يگەرىلۋى جاعىنان ەش كۇمان جوق»، - دەدى وبلىس باسشىسى قىرىمبەك كوشەربايەۆ.
«قىرىمبەك ەلەۋ ۇلى، جىلدىڭ سوڭىنا دەيىن قارجىنىڭ يگەرىلەتىندىگىنە كۇمانىمىز جوق. ءبىراق، سىزدەر ەشقانداي پروبلەما جوق، قارجىنى يگەرەمىز دەيسىزدەر. بىزگە ۋاقىتىندا يگەرىلگەنى كەرەك. قارجىنى الاتىن كەزدە بارلىق اكىمشىلەر «ۋاقىتىندا يگەرەمىز، بەرىڭىزدەر» دەيدى. ال العاننان كەيىن ساتىپ الۋشىلار، مەردىگەرلەر، تاعى دا باسقا تولىپ جاتقان كەمشىلىكتەردى ايتا باستايمىز»، - دەپ اتاپ ءوتتى پرەمەر- مينيستر.
ۇكىمەت باسشىسىنىڭ دەرەگىنشە، تۇركىستان وبلىسى دا 1,9 ميلليارد تەڭگەنى يگەرە الماعان.
«جالپى جەرگىلىكتى بيۋدجەتتىڭ كىرىستەر جوسپارى 109,7 پايىزعا ورىندالىپ، وتكەن جىلدىڭ وسىنداي كەزەڭمەن سالىستىرعاندا 7,3 ميلليارد تەڭگە ارتىق ءتۇستى، ياعني 1,5 ميلليارد تەڭگەگە ارتىپ وتىر. ال يگەرىلمەۋگە بايلانىستى 2 ميلليارد تەڭگە شىمكەنت قالاسى بويىنشا رەسپۋبليكالىق جانە وبلىستىق بيۋدجەتتەن قارالعان نىسانالى ترانسفەرتتىڭ ەسەبىنەن قۇرالىپ وتىر. بۇل قارجىلار رەسپۋبليكالىق بيۋدجەتكە ءتيىستى وزگەرىستەر ەنگىزىلگەن سوڭ ءبىزدىڭ بيۋدجەتتەن قىسقارتىلىپ، شىمكەنت قالاسىنىڭ بيۋدجەتىنە اۋىستىرىلاتىن بولادى. قالعان بولىگىندە جىل سوڭىنا دەيىن ءوزىمىزدىڭ سۋبەكتيۆتى سەبەپتەرىمىزگە بايلانىستى شارا قولدانامىز. يگەرەمىز دە ءسوز بەرەمىز»، - دەدى تۇركىستان وبلىسىنىڭ اكىمى جانسەيىت تۇيمەبايەۆ.
«جانسەيىت قانسەيىت ۇلى، قازىر تۇركىستان وبلىسىنىڭ قۇرىلعانى تۋرالى شەشىم قابىلدانىپ، جۇمىسقا كىرىسىپ كەتتىڭىزدەر. ەلباسىنىڭ تاپسىرماسى بويىنشا قوسىمشا قاراجات بولىنەدى. قازىردىڭ وزىندە ۇكىمەت رەزەرۆىنەن قارجى ءبولىنىپ جاتىر. وسىنىڭ بارلىعى ۋاقىتىندا يگەرىلۋى كەرەك. بۇل وتە ۇلكەن ماڭىزدى شارا. وسىعان باسا كوڭىل اۋدارىڭىز»، - دەپ ەسكەرتتى ۇكىمەت باسشىسى.
باقىتجان ساعىنتايەۆتىڭ دەرەگىنشە، الماتى قالاسى دا قوماقتى قارجى يەگەر الماعان.
وسى ماسەلەگە قاتىستى جاۋاپ بەرگەن قالا باسشىسى باۋىرجان بايبەك يگەرىلمەگەن بيۋدجەت 3,4 ميلليارد تەڭگەنى قۇراعانىن ايتتى. 1,3 ميلليارد تەڭگە جەر ۋچاسكەلەرىن الۋ بويىنشا سوتتا قارالىپ جاتىر. اباي داڭعىلىن ۇزارتۋعا 1,1 ميلليارد تەڭگە قايتا قارالادى. 218 ميلليون تەڭگە وجەت اۋىلىندا سۋ قۇبىرى جۇيەسى بويىنشا جۇمىستار كەشىكتىرىلگەن.
«قارجى مينيسترلىگىنە تاپسىرما: الماتى قالاسى، باسقا وڭىرلەر دە ۇنەمدەلگەن اقشا، يگەرىلمەگەن قاراجات جايىندا ايتىپ جاتىر. ەربولات اسقاربەك ۇلى (ۇكىمەت باسشىسىنىڭ ورىنباسارى- اۆت) بيۋدجەتتەن قوسىمشا قارجى سۇراپ وتىر. مىنە قالتالارىندا اقشالار بار. ەشقانداي قوسىمشا قارجىنىڭ قاجەتى جوق، سونى الىپ جاساسىن»، - دەپ ەسكەرتتى باقىتجان ساعىنتايەۆ قارجى ءمينيسترى باقىت سۇلتانوۆقا.
پرەمەردىڭ دەرەگىنشە، اقمولا وبلىسى 1,4 ميلليارد تەڭگە يگەرمەگەن.
ماسەلەنى بىلەتىندىگىن ايتقان وبلىس اكىمى مالىك مىرزالين «سەبەبى مەردىگەرلەر اۋا رايىنىڭ قولايسىزدىعىنا بايلانىستى جۇمىس كەستەسىنەن قالىپ كەلەدى. جىل اياعىنا دەيىن بارلىعىن شەشەمىز»، - دەدى.
«اۋا رايى تەك اقمولا وبلىسىنا عانا ەمەس، سولتۇستىك قازاقستان وبلىسىندا، قوستاناي وبلىسىندا دا سونداي. ال ءبىراق، ول وڭىرلەردە قارجى يگەرىلىپ جاتىر. جاۋاپ بەرگەندە دە قيسىنىن كەلتىرىپ جاۋاپ بەرىڭىز»، - دەپ ەسكەرتتى باقىتجان ساعىنتايەۆ.
«قۇرمەتتى ارىپتەستەرى وتكەندە ايتقانمىن، تاعى دا قايتالاپ ايتامىن. يگەرىلمەگەن قارجىنىڭ بارلىعى شۇعىل قاجەت بولىپ وتىرعان سالالارعا كەتەدى. 6 ايدىڭ قورىتىندىسى بويىنشا قاراعانبىز. قازىر دە ءدال سونداي. بيۋدجەتتى قايتا قاراۋ كەزىندە سىزدەردىڭ قاراۋلارىڭىزدان الىناتىن بولادى»، - دەپ قوستى ۇكىمەت باسشىسى.
اۆتور: مارلان جيەمباي
