باقىتجان ساعىنتايەۆ مينيسترلەردىڭ «شاڭىن» قاقتى

استانا. قازاقپارات - بۇگىن ۇكىمەتتىڭ سەلەكتورلىق رەجىمدەگى وتىرىسىندا ق ر پرەمەر- ءمينيسترى باقىتجان ساعىنتايەۆ بيۋدجەت قاراجاتىن يگەرە الماعان مينيسترلەردى سىنعا الدى، دەپ حابارلايدى قازاقپارات ءتىلشىسى.

الدىمەن باقىتجان ساعىنتايەۆ ەلىمىزدىڭ قورعانىس مينيسترلىگى 15,4 ميلليارد تەڭگە قاراجاتتى يگەرە الماي جاتقانىن ايتىپ سەبەبىن سۇرادى.

«باقىتجان ءابىر ۇلى، ءبىز ونى بىلەمىز. قازىر تالداپ جاتىرمىز. مىندەتتى تۇردە ناقتى شارالار قولداناتىن بولامىز»، - دەدى قورعانىس ءمينيسترى نۇرلان ەرمەكبايەۆ.

«ءسىز مينيستىرلىككە جاڭادان كەلىپ جاتىرسىز، نە سەبەپتەن يگەرىلمەي جاتقانىن قاراڭىز. جىلدىڭ سوڭى بولىپ قالدى، ەڭ ۇلكەن قارجى ءسىزدىڭ مينيسترلىكتىڭ ەسەبىندە بولىپ تۇر»، - دەدى ۇكىمەت باسشىسى.

مۇنان كەيىن پرەمەر- مينيستر مادەنيەت جانە سپورت مينيسترلىگى 11,1 ميلليارد تەڭگە يگەرىلمەگەندىگىن ايتتى. وسى ماسەلەگە قاتىستى جاۋاپ بەرگەن مادەنيەت جانە سپورت ءمينيسترى ارىستانبەك مۇحامەدي ۇلى بارلىعى جوسپارلى تۇردە ءجۇرىپ جاتقانىن ايتىپ اقتالدى.

«قالاي جوسپارلى تۇردە جۇرەدى، ەگەر 8 ايدىڭ قورىتىندىسىندا يگەرىلمەگەن اقشا بولسا، ءبىز جوسپارلى تۇردە يگەرمەي وتىرامىز با؟»، - دەدى ءمينيستردىڭ جاۋابىنا كوڭىلى تولماعان ۇكىمەت باسشىسى.

وسى رەتتە مينيستر تەحنيكالىق ماسەلەلەردىڭ بولعانىن ايتتى.

«11 ميلليارد تەڭگەگە 8 ايدىڭ ىشىندە قانشا مەكتەپ، قانشا شاقىرىم جول، قانشاما بالاباقشا، اۋرۋحانا سالۋعا بولاتىنىن بىلەسىز بە؟»، - دەپ سۇرادى باقىتجان ساعىنتايەۆ.

«سۇلتانوۆ ايتقانداي، كىم يگەرمەسە بيۋدجەتتى الىپ قويامىز. وكپەلەمەڭىزدەر»، - دەپ ەسكەرتتى پرەمەر- مينيستر مينيسترلەرگە.

ۇكىمەت باسشىسىنىڭ دەرەگىنشە، اۋىل شارۋاشىلىعى مينيسترلىگى 10,9 ميلليارد تەڭگە يگەرمەگەن.

«ءبىزدىڭ بيۋدجەت 355 ميلليارد تەڭگە. سونىڭ 10,9 ميلليارد تەڭگەسى 8 ايدىڭ قورىتىندىسىندا يگەرىلمەگەن. ونىڭ ىشىندە 5 ميلليارد تەڭگەدەن استامى سۋ شارۋاشىلىعىنان اكتىلەر كۇتىپ وتىرمىز. بىردەن اقشا تولەنەدى. سودان كەيىن عىلىم جاعىنان 3,5 ميلليارد تەڭگەنى تولەۋگە باياعىدان دايىنبىز. ءبىراق، مىناۋ ءبىلىم مينيسترلىگىنە ءوتىنىم ماۋسىم ايىندا، ودان كەيىن تامىز ايىندا بەرىلگەن. ول جەردە 90 كۇن قارالادى. سونى ءبىز قالاي قىسقارتامىز؟ ول كىسىلەرمەن قايتا قايتا سويلەسىپ وتىرمىن. قاراۋ مەرزىمىن قىسقارتۋ كەرەك شىعار؟»، - دەپ اقتالدى ۇكىمەت باسشىسىنىڭ ورىنباسارى - اۋىل شارۋاشىلىعى ءمينيسترى ءومىرزاق شوكەيەۆ.

«ءومىرزاق ەستاي ۇلى، ءسىز ۇكىمەت باسشىسىنىڭ ورىنباسارىسىز. مينيسترگە قاراعاندا ءسىزدىڭ لاۋازىمىڭىز جوعارى. شاقىرىپ الىپ، جوبانى قاراڭىز. ءتارتىبىن وزگەرتەسىز. بەرىلگەن قارجى يگەرىلۋى قاجەت. اقشا الاسىزدار، يگەرىلمەي جاتادى. وندا نە ءۇشىن اقشا بەرىلەدى؟»، - دەدى ۇكىمەت باسشىسى.

كەلەسى كەزەكتە پرەمەر- مينيستر ىشكى ىستەر مينيسترلىگىنىڭ دە قوماقتى قارجىنى يگەرە الماي وتىرعانىن ەسكەرتتى.

«4,5 ميلليارد تەڭگە كەلىسىمشارتتامىز، ونى قىركۇيەككە دەيىن ورىندايمىز. 2,9 ميلليارد تەڭگە ۇنەمدەلگەن قاراجات. قورعاسقا قاتىستى قوسىمشا شارتتار دا بار»، - دەدى ءوز كەزەگىندە ىشكى ىستەر ءمينيسترى قالمۇحانبەت قاسىموۆ.

«قىركۇيەكتىڭ ىشىندە وتىرمىز عوي، قالاي قىركۇيەكتە؟ وتىرىك ايتقاندا دۇرىستاپ ايتۋ كەرەك قوي. قوسىمشا شارت دەگەن نە، ول؟ قاراجاتتىڭ 9,5 ميلليارد تەڭگەسى يگەرىلمەي جاتادى. ال ءسىز قوسىمشا شارت دەيسىز. قارجى كەرەك ەمەس قوي، سوندا»، - دەدى باقىتجان ساعىنتايەۆ.

اۆتور: مارلان جيەمباي