ەل ەكونوميكاسىنىڭ جالپى ىشكى ءونىم ءوسىمى باياۋ - سۇلەيمەنوۆ

استانا. قازاقپارات - ەل ەكونوميكاسىنىڭ جالپى ىشكى ءونىم ءوسىمى باياۋ. بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىندا ق ر ۇلتتىق ەكونوميكا ءمينيسترى تيمۋر سۇلەيمەنوۆ ايتتى، دەپ حابارلايدى قازاقپارات ءتىلشىسى.

«اعىمداعى جىلعى قاڭتار- تامىزدا قازاقستان ەكونوميكاسىنىڭ وڭ ءوسۋ ءۇردىسى ساقتالىپ وتىر. سونىمەن بىرگە، دامۋ الەمدىك نارىقتارداعى قاۋىپتەر مەن قۇبىلۋدىڭ كۇشەيۋى جاعدايىندا ءجۇرىپ جاتىر. ەسەپتى كەزەڭدە جالپى ىشكى ءونىمنىڭ ءوسۋى 3,8 پروتسەنتتى قۇرادى. بۇل اعىمداعى جىلعى 7 ايداعى كورسەتكىشتەن 0,2 پروتسەنتتىك تارماققا تومەن. جالپى ىشكى ءونىمنىڭ ءوسۋى بويىنشا 4 پروتسەنت ماقساتقا جەتۋ ءۇشىن، اي سايىنعى ءوسۋدى اعىمداعى جىلدىڭ سوڭىنا دەيىن ورتا ەسەپپەن 4,2 پروتسەنت دەڭگەيىندە قامتاماسىز ەتۋ قاجەت»، - دەدى مينيستر.

ونىڭ اتاپ وتۋىنشە، ينفلياتسيا دەڭگەيى 2017 -جىلعى سايكەس كەزەڭدەگىدەن جاقسى قالىپتاستى. جىلدىڭ باسىنان بەرى ول 2,9 پروتسەنتتى قۇرادى، جىلدىق ينفلياتسيا - 6,0 پروتسەنت.

 «اعىمداعى جىلعى 1 - قىركۇيەكتەگى جاعداي بويىنشا ەلدىڭ حالىقارالىق رەزەرۆتەرى 87,3 ميلليارد ا ق ش دوللارىن، ۇلتتىق قوردىڭ اكتيۆتەرى 56,5 ميلليارد ا ق ش دوللارىن قۇرادى. التىن- ۆاليۋتا رەزەرۆتەرى 0,1 پروتسەنتكە ءوسىپ، 30,8 ميلليارد ا ق ش دوللارىنا جەتتى»، - دەدى ول.

  اۆتور: مارلان جيەمباي